Шурӯъ аз имрӯз кормандони мақомоти ҳифзи ҳуқуқ ва сохторҳои қуратии Тоҷикистон ба реҷаи шабонарӯзии адои хизмат гузаштанд.
Тавре ба «Азия-Плюс» як манбаъ аз мақомоти мазкур хабар дод, барои таъмини амнияту бехатарии чорабиниҳо бахшида ба 23-юмин солгарди Рӯзи истиқлоли давлатии ҷумҳурӣ (9-уми сентябр) ва нишасти сарони кишварҳои узви СҲШ (11-12-уми сентябр), аз чунин тадбир кор гирифта шудааст.
«Тамоми хиёбону кӯчаҳо, майдону гулгаштҳои пойтахт, макони баргузории чорабиниҳои нишасти СҲШ, ҷойҳои ҷамъшавии издиҳоми мардум ва иншооти муҳими давлатӣ таҳти назорат ва посбонӣ гирифта шуда, пойтахти кишвар шабона аз ҷониби дастаҳои тақвиятшудаи сохторҳои қудратӣ назорату посбонӣ мешавад», – гуфт манбаъ.
Зимнан зикр гардид, ки рӯзҳои баргузории нишасти СҲШ ба пойтахт нерӯ ва воситаҳои иловагии сохторҳои қудратӣ аз манотиқи кишвар сафарбар мешаванд.
