Рӯҳонии маъруфи минтақаи ҷануби ҷумҳурӣ мулло Ҳайдар (Ҳайдар Шарифов) пешниҳод кард, ки дар минтақаи Кӯлоби вилояти Хатлон намояндагии Маркази исломии Тоҷикистон (муфтиёт) боз карда шавад.
Тавре ба «Азия-Плюс» мудири шуъбаи умури дини минтақаи Кӯлоб Шариф Абдулҳамидов хабар дод, ин пешниҳодро ӯ зимни семинар-машварате иброз доштааст, ки муовини раиси Кумита оид ба корҳои дин, танзими анъана ва ҷашну маросимҳои миллии назди ҳукумати Тоҷикистон Ҷумъахон Ғиёсов дар Кӯлоб гузаронидааст.
Ба гуфтаи ӯ, мулло Ҳайдар ин пешниҳоди худро бо он асоснок кардааст, ки дар минтақа дар маҷмӯъ 558 масҷид амал карда, 558 нафар имомхатибон дар ҳалли мушкилот аксаран намедонанд, ки ба Кумита муроҷиат кунанд ё Маркази исломӣ.
«Фаъолияти намояндагии Маркази исломӣ дар минтақа садҳо нафарро аз мушкилоти зиёдатӣ ҳам дар Душанбеву ҳам дар Кӯлоб раҳо карда, ба ҳаллу фасли зудтари онҳо мусоидат мекунад», – иброз доштааст мулло Хайдар.
