– Аз 27-уми октябр то 21-уми ноябри соли равон Тоҷикистону Чин дар самти мубориза бо ҷинояткории фаромарзии марбут ба муомилоти ғайриқонунии маводи мухаддир амалиёти муштарак баргузор мекунанд, – иттилоъ медиҳад хабаргузории чинии Синхуа.
Маросими расмии оғози амалиёт рӯзи 27-уми октябр дар шаҳри Урумчӣ – маркази маъмурии вилояти Синтзян-Уйғур (минтақаи Шимолу Ғарби Чин) доир гардидааст.
Ба иттилои манбаъ, амалиёт бо таъсиси қароргоҳи танзими амалҳои муштараки идораи Кумитаи давлатии мубориза бо тиҷорати маводи мухаддири Чин ва Агентии назорати маводи нашъаовари назди президенти ҶТ сурат гирифта, дар ин давра ба фурудгоҳҳо ва гузаргоҳҳои марзӣ таваҷҷуҳи хосса зоҳир мегардад.
Гуфта мешавад, ҷонибҳо механизми табодули маълумот ва ҳамоҳангсозии амалҳоро низ роҳандозӣ мекунанд, «то ки як қатор парвандаҳои ҷинояткории фаромарзии марбут ба муомилоти ғайриқонунии маводи мухаддирро ошкор сохта, гурӯҳ ва шабакаҳои ҷинояткориро маҳв ва пешвоёни онҳоро безарар гардонанд».
