Имрӯз, 12-уми январи соли 2015 конфронси интихоботии бахшҳои Ҳизби наҳзати исломии Тоҷикистон дар ноҳияҳои Ҷ. Рӯмӣ, Қубодиён ва Ҷиликул оиди пешбарии номзад ба вакилии Маҷлиси намояндагон аз ҳавзаи Ҷ. Румӣ №30 дар қароргоҳи бахши ҳизб дар шаҳраки Румӣ баргузор гардида, бо аксари оро номзадии вакил Абдуқаҳҳори Давлат пешниҳод гардид.
Бино ба иттилои сомонаи расмии ҲНИТ, кори конфронс дар фазои хуб пеш мерафт, аммо хонум Майрамбӣ Ғаффорова, муовини раиси ҳукумати Ҷ. Румӣ дар рафти суханронии Муҳиддин Кабирӣ, роҳбари ҳизб ва вакили МН халал ворид кард. «Вақте Муҳиддин Кабирӣ гуфт, ки бояд аз Худованди карим шукргузорӣ кард ва аз миллати тоҷик барои ваҳдат ва бародарӣ шукрона кард, нохост хонум Ғаффорова аз ҷой бархоста, бидуни гирифтани иҷозат суҳбати М. Кабириро қатъ карда, ба овози баланд гуфт, ки бояд аз Ҷаноби олӣ шукрона кард», – омадааст дар хабар.
Гуфта мешавад, дар ҳамин ҳол, Муҳиддин Кабирӣ хитоб ба ӯ гуфт: “Мунтазир бошед, ман то ҳол ҷумлаамро ба итмом нарасондаам. Ҳатман аз Президенти кишвар ва Шумо барои ҳамкорӣ ташаккур мегӯям.” Вале хонум Ғаффорова баъди халал ворид кардан ба нишони эътироз конфронсро тарк кард.
Зирк мегардад, ки дар кори конфронс 120 вакил ва 300 меҳмон ширкат карданд. Ҳамчунин, Муҳиддин Кабирӣ – раиси ҳизб ва вакили МН, Қамариддин Афзалӣ – раиси шуъбаи ҳизб дар вилояти Хатлон, Илҳомҷон Ёқубов – мушовири раиси ҳизб оид ба муҳоҷирати меҳнатӣ, Муҳаммадҷони Нурӣ – мушовири раиси ҳизб, Нуралӣ Сафаралиев – раиси Комиссияи ҳавза, Майрамбӣ Ғаффорова – муовини раиси ҳукумати Ҷ. Румӣ ва ғайра ҳузур доштанд.
