Дар ҷаласаи навбатии имрӯзаи Комиссияи марказии интихобот ва раъйпурсии Тоҷикистон масъалаи сабти расмии номзадҳои тибқи рӯйхати ҳизбӣ пешбаришудаи Ҳизби наҳзати исломии Тоҷикистон (ҲНИТ) ва Ҳизби коммунисти Тоҷикистон (ҲКТ) аз ҳавзаи ягонаи ягонаи умумиҷумҳуриявӣ баррасӣ мешавад.
Бино ба маълумоти КМИР Тоҷикистон, рӯйхати ҲНИТ таҳти роҳбарии раиси ҳизб Муҳиддин Кабирӣ аз 27 нафар номзадҳо ва рӯйхати ҲКТ таҳти роҳбарии раиси ҳизб Шодӣ Шабдолов аз 7 нафар номзадҳо иборат аст.
Зимнан зикр гардид, ки рӯзҳои 20 ва 21-уми январ КМИР рӯйхатҳои ҳизбии ҲХДТ аз 27 нафар номзадҳо таҳти сарварии ёвари президент оид ба масоили кадрҳо Абдуҷаббор Азизӣ, рӯйхати Ҳизби аграрӣ аз 13 нафар номзадҳо бо роҳбарии раиси ҳизб Рустам Латифзода, ҲДТ таҳти роҳбарии раиси ҳизб Саидҷаъфар Исмонов иборат аз 4 нафар номзадҳо, ҲСТ таҳти роҳбарии раиси ҳизб Абдуҳалим Ғаффоров иборат аз 6 нафар номзадҳо ва ҲИИТ таҳти роҳбарии раиси ҳизб Олимҷон Бобоев иборат аз 6 нафар номзадҳоро расман ба қайд гирифт.
