Субҳи имрӯз фазои фурудгоҳи Душанберо тумани ғафс пӯшонда, бар асари он дар ҷадвали парвозҳо тағйирот ворид гардид.
Тавре котиби матбуотии Фурудгоҳи байнулмилалии Душанбе Муҳммадюсуф Шодиев хабар дод, ҳавопаймоҳо дар хатсайрҳои Самара-Душанбе рейси №254 ва Истамбул-Душанбе рейси №2927 алъон аз фурудгоҳҳои худ парвоз накарда, интизори хуб шудани ҳавои фурудгоҳи Душанбеанд.
Мутахассисон иброз доштанд, ки дар хати нишасту парвози фурудгоҳи Душанбе сатҳи биноӣ наздик ба 200 метр аст, ин дараҷаи биниш имкони фурудоӣ ва парвозро маҳдуд месозад.
Ҳавопаймои рейси №201 хатсайри Душанбе-Москва барои парвоз омода аст, аммо иҷозаи парвоз дода нашуда, дар назар аст, бо андаке пароканда шудани туман парвоз амалӣ мегардад. Мусофирони рейси мазкур мушкиле надоранд, аллакай расмияти фурудгоҳиро гузашта, дар ҳавопаймо интизори парвозанд.
Фурудгоҳи Душанбе дар ҳолати муқаррарӣ фаъолият дошта, бо пароканда шудани туман қабул ва гусели ҳавопаймоҳо оғоз мегардад.
