Вазири рушди иқтисод ва савдои Тоҷикистон Неъматулло Ҳикматулозода рӯзи 11-уми феврал бо сафири Озарбойҷон дар ҶТ Аббосалӣ Ҳасанов мулоқот орсота, зимни вохӯрӣ масъалаи ҳамкориҳои иқтисодию тиҷоратии дуҷониба бараасӣ шуданд.
Бино ба иттилои хадамоти матбуоти Вазорат, ҳангоми мулоқот ҷонибҳо атрофи масъалаҳои густариши ҳамкориҳои иқтисодию тиҷоратӣ, махсусан дар соҳаҳои ҷалби сармоягузорӣ, коркарди маҳсулоти кишоварзӣ, барқарор намудани хатсайри мустақими ҳавоӣ байни Душанбе ва Боку, омодагӣ ба ҷаласаи навбатии Комиссияи байниҳукуматии Тоҷикистону Озарбойҷон оид ба ҳамкориҳои иқтисодию тиҷоратӣ ва илмию фарҳангӣ ва ғайра табодули назар карданд.
Гуфта мешавад, дар интиҳои вохӯрӣ тарафҳо азми қавии худро ҷиҳати густариши минбаъдаи ҳамкориҳо дар самтҳои гуногун баён доштанд.
Ёдрас мекунем, ки нимаи дуюми моҳи октябри соли гузашта пас аз мулоқот бо президенти Озарбойҷон Илҳом Алиев сарвари давлати Тоҷикистон Эмомалӣ Раҳмон
изҳор намуда буд
, ки ҷонибҳо ба роҳандозии хатсайри мустақими ҳавоӣ байни Тоҷикистону Озарбойҷон манфиатдоранд.
Қобили зикр аст, ки 10-уми июли соли 2012 хатсайри мустақими ҳавоии Душанбе – Боку ифтитоҳ гардида, вале бинобар сабаби камбуди мусофирон минбаъд баста шуд. Моҳи марти соли 2013 низ ин хатсайр барқарор карда шуд, вале боз ҳам ба иллати сабаби дар боло зикршуда мутаваққиф гардид.
