Зимни суханронӣ дар чорабиниҳо ба муносибати 40-солагии таъсисёбии КВД «Ширктаи алюминии тоҷик (ТАЛКО) нахуствазири Тоҷикистон Қоҳир Расулзода изҳор намуд, ки ҳукумат масъалаи бунёди бузургтарин Маркази барқу гармидиҳӣ (МБГ) дар кишварро мавриди омӯзиш қарор додааст ва дар бораи сохтмони МБГ бо иқтидори аз 700 то 1000 МВт дар ҷумҳурӣ дастури сарвари давлат мавҷуд аст.
Расулзода қайд кард, ки сохтмони чунин марказ дар ноҳияи Айнии вилояти Суғд, бевосита дар наздикии кони бузургтарини ангишти «Фон Яғноб» дар назар буда, ин кон қаблан ба тавозуни ТАЛКО гузаронида шудааст ва барои фаъолияти МБГ-и оянда ҳамасола истихроҷи то 1,5 млн. тонна ангишт дар ин кон зарур аст.
«ТАЛКО ин марказро бо ангишти кони мазкур таъмин карда метавонад, ки ин як навъи дастгирии молиявии корхона аст. Ҳадафи ҳукумат бошад, ҳарчи беҳтар кардани таъмини аҳолӣ бо нерӯи барқ аст» – афзуд нахуствазир.
