Рӯзи 5 май вазири корҳои дохилии Тоҷикистон генерал-лейтенанти милитсия Раҳимзода Рамазон Ҳамро бо сафири тозатаъини Ҷумҳурии Исломии Покистон дар Тоҷикистон ҷаноби Тариқ Иқбол Соом дидору гуфтушунид кард.
Бино ба иттилои маркази матбуоти ВКД ҶТ, зимни вохӯрӣ ҷонибҳо масоили ҳамкориҳои дуҷониба дар самти мубодилаи ахбор ва мубориза бар зидди ҷиноятҳои фаромиллӣ аз қабили терроризм, экстремизм ва қочоқи маводи мухаддирро мавриди баррасӣ қарор доданд.
Гуфта мешавад, заминаи ҳуқуқии ҳамкориҳо байни мақомотҳои корҳои дохилии ҳарду ҷониб мустаҳкам гардонида шуда, соли 2004 байни Ҳукумати Ҷумҳурии Тоҷикистон ва Ҳукумати Ҷумҳурии Исломии Покистон Созишнома оид ба ҳамкорӣ дар мубориза бо муомилоти ғайриқонунии воситаҳои нашъадор, моддаҳои психотропӣ ва прекурсорҳои онҳо ба имзо расонида шудааст.
Ба иттилои манбаъ, ҳамчунин лоиҳаи Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Исломии Покистон оид ба ҳамкорӣ дар соҳаи мубориза бар зидди ҷинояткорӣ таҳия гардида, мавриди баррасӣ қарор дорад.
Изҳори умедворӣ карда шудааст, ки баъди ба имзо расидани лоиҳаи Созишномаи мазкур ҳамкориҳо дар самтҳои тартиботи ҳуқуқӣ, мубориза бо ҷинояткорӣ ва таҳкими амният минбаъд низ густариш хоҳанд ёфт.
