Мовини сарвазири Тоҷикистон Азим Иброҳим ҷаласаи 4-уми Шӯрои ҳамоҳангсозӣ оид ба бехатарии маҳсулоти хӯроквориро баргузор намуд.
Бино ба иттилои
АМИТ «Ховар»
, дар ҷараёни ҷаласа зикр гардидааст, ки дар доираи Нақшаи гурўҳҳои кории соҳавӣ аз ҷониби вазорату сохторҳои масъул корҳои муайян иҷро гардида, Барномаи мутобиқгардонии иқтисодиёти Ҷумҳурии Тоҷикистон бинобар узвият дар Созмони умумиҷаҳонии савдо ба тасвиб расид.
Гуфта мешавад, ҳамчунин дар ҷаласа оид ба як зумра корҳои анҷомдодаи вазорату идораҳои марбута дар доираи татбиқи нақшаи чорабиниҳо, аз ҷумла оид ба роҳҳои беҳтар намудани ҷалби сармояи хориҷӣ ба иқтисодиёти ҶТ, доир ба роҳҳои беҳтар намудани бехатарии маҳсулоти хўрокворӣ дар Тоҷикистон ва тадбирҳои баланд бардоштани маърифати истеъмолкунандагон дар соҳаи бехатарии маҳсулоти хўрокворӣ маълумот дода шуд.
Ба иттилои манбаъ, оид ба масъалаҳои байторӣ, фитосанитарӣ ва карантини растанӣ зикр шудааст, ки дар чор моҳи аввали соли 2015 ба Тоҷикистон аз дигар давлатҳо ба миқдори зиёд маҳсулоти гуногуни таҳти карантин қарор дошта ворид шуданд.
Зимнан зикр мегардад, ки муовини сарвазир барои тақвияти фаъолияти сохторҳои дахлдор дар самти таъмини ҳолати санитарию эпидемиологӣ ва ҳифзи бозори дохилии кишвар аз воридоти маҳсулоти хўрокворӣ бехатарияш таъминнабуда, масъулини дахлдорро вазифадор намуда, иҷрои ҳатмии нақшаи кории таҳияшударо тақозо кард.
