Нахуствазири Тоҷикистон Қоҳир Расулзода рӯзи 13 майи соли равон президенти корпоратсияи 19-уми сохтмонии Чин Ги Юнлиро ба ҳузур пазируфт.
Сармушовири хадамоти матбуоти президенти ҶТ Субҳиддин Муҳиддинов ба «Азия-Плюс» дар ин робита иттилоъ дод, ки дар мулоқот масоили марбут ба иштироки ин ширкати чинӣ дар сохтмони пулу нақбҳо дар қитъаи Ваҳдат – Ёвони роҳи оҳани Душанбе – Қӯрғонтеппа баррасӣ шуданд.
Дар қитъаи зикршудаи роҳ ширкати чинӣ се нақб ва панҷ пул месозад ва дар ин робита нахуствазири ҷумҳурӣ аз роҳбари ширкат даъват намуд, ки ба сифати корҳои сохтмон таваҷҷуҳи ҷиддӣ зоҳир карда шавад.
Қоҳир Расулзода таъкид доштааст, ки қитъаи роҳи оҳани Ваҳдат – Ёвон минбаъд як қисмати роҳи оҳани байнулмилалии Чин – Қирғизистон – Тоҷикистон – Афғонистон хоҳад шуд.
