Бар асари сар задани сӯхтор, ки рӯзи 22 май дар яке аз биноҳои анбори ҶДММ «Элформ» дар шаҳри Красногорски вилояти Маскави Русия ба амал омад, шаҳрванди Тоҷикистон – зодаи шаҳри Ваҳдат Бахтовар Самадови 19-сола ба ҳалокат расид.
Сухангӯи намояндагии мақомоти муҳоҷирати Тоҷикистон дар Русия Иброҳим Аҳмадов ба «Азия-Плюс» дар ин робита иттилоъ дод, ки дар ин бора ба намояндагӣ як хеши ҳалокшуда Бахтиёр Сафолов хабар дода, изҳор намудааст, ки Бахтовар ҳамроҳи боз ду нафар шаҳрвандони Тоҷикистон дар ин шикрат машғули кор будааст.
Зимнан зикр гардид, ки сӯхтор майдони беш аз 700 метри мураббаъро фаро гирифта, тибқи маълумоти пешакӣ, эҳтимоли сар задани сӯхтор беэҳтиётӣ ҳангоми кор бо таҷҳизоти барқӣ барои буридани металл ва риоя накардани қоидаҳои бехатарии зиддисӯхтор арзёбӣ мешавад.
