Президенти Ҷумҳурии Тоҷикистон Эмомалӣ Раҳмон Вазири нерӯ ва саноати Давлати Қатар Муҳаммад ибни Солеҳ ас-Содаро ба ҳузур пазируфт.
Бино ба иттилои хадамоти матбуоти сарвари давлат, дар мулоқот масоили вобаста ба рушди робитаҳои Тоҷикистону Қатар баррасӣ шуда, Эмомалӣ Раҳмон ба ҷониби Қатар барои қабули даъвати Тоҷикистон ва иштироки ҳайати расмии ин кишвар дар Конфронси байналмилалии сатҳи баланд доир ба масоили даҳсолаи амалиёти “Об барои ҳаёт” дар шаҳри Душанбе арзи сипос кард.
Президенти кишвар ҳамчунин аз ҳамкории иқтисодию тиҷоратии Тоҷикистону Қатар, аз ҷумла фаъолияти босамари ҶДММ Қатар Диар Реал Истейт Инвестмент Компани – Тоҷикистон ва лоиҳаҳои шаҳраки Диёри Душанбе ва Масҷиди калон дар шаҳри Душанбе ёдовар шуда, ин тадбирҳоро “намунаи беҳтарини ҳамкории Тоҷикистон бо кишварҳои арабӣ” номид.
Муҳаммад ибни Солеҳ ас-Сода ба Сарвари давлати Тоҷикистон Эмомалӣ Раҳмон дуруду паёми Амири Давлати Қатар Шайх Тамим ибни Ҳамад оли Сониро расонда, ҳавасмандии кишварашро ба густариши робитаҳо бо Тоҷикистон таъкид дошт.
Гуфтугӯйи судманд атрофи нақшаҳои ояндаи ҳамкорӣ, аз ҷумла доир ба таъсиси Бонки тиҷоратии қатарӣ ва маблағгузории Фонди рушди қатарӣ ба лоиҳаҳои хурду миёнаи саноатӣ дар қаламрави Тоҷикистон сурат гирифт.
Бо изҳори қаноат аз вуҷуди заминаи қарордодию ҳуқуқии ҳамкорӣ миёни ду кишвар, ҳамзамон зарурати ба имзо расондани чанд санади иловагӣ, аз ҷумла дар бораи канорагирӣ аз андозбандии дукарата таъкид гардид.
