Зимни баррасии лоиҳаи қонун «Дар бораи таъмини амнияти экологии нақлиёти автомобилӣ» дар ҷаласаи имрӯзаи палатаи поёнии парлумон баҳси пурҷӯшу хурӯш сурат гирифт, зеро муовини раиси Кумитаи ҳифзи муҳити зисти назди ҳукумати ҶТ Шамс Назаров зимни суханронӣ назди вакилон ғайриинтизор барои ҳама пешниҳод кард, ки ин масъала аз рӯзномаи маҷлис хориҷ карда шавад, зеро баъзе моддаҳои қонуни мазкур бо Кумита мувофиқа нашудаанд.
Раиси палатаи поёнии парлумон Шукурҷон Зуҳуров аз ин норозигӣ изҳор намуда, аз кумитаву комиссияҳои парлумон шарҳи ин масъаларо талаб кард, зеро ба гуфти ӯ, лоиҳаи қонуни мазкур ҳанӯз ахири соли гузашта омода шуда, маълум нест, ки бо кадом сабаб бо мақомоти дахлдор мувофиқа нашудааст.
Яке аз муаллифони лоиҳаи қонун, вакили парлумон Олимҷон Сафаров қайд кард, ки Кумитаи ҳифзи муҳити зисти назди ҳукумат бо ифодаи «мақомоти дахлдори давлатӣ» дар лоиҳа розӣ нест ва талаб дорад, ки он бо ифодаи»Кумитаи ҳифзи муҳити зисти назди ҳукумати ҶТ» иваз карда шавад.
Пас аз шарҳи вакил Шукурҷон Зуҳуров изҳор намуд, ки Кумитаи ҳифзи муҳити зисти назди ҳукумати ҶТ аз тартиби оддии омода ва таҳия намудани лоиҳаи қонунҳо огаҳӣ надорад.
«Зери ифодаи «мақомоти дахлдори давлатӣ» албатта Кумитаи шумо дар назар аст ва наход Шумо ҳаминро ҳам надонед ва умуман бигзор дар ҷаласаҳои минбаъдаи парлумон раиси Шумо иштирок кунад, на муовинони ӯ. Ин ба роҳбарони ҳамаи вазорату идорахои ҷумҳурӣ дахл дорад», – иброз дошт Зуҳуров.
Дар идома ӯ зикр кард, ки Кумитаи ҳифзи муҳити зист муддати зиёдест, ки ба ӯ дар бораи вазъи экологӣ дар марзи Тоҷикистону Ӯзбекистон дар самти вилояти Суғд маълумотнома пешниҳод карда наметавонад. «Шумо ҳатто аз вазъи воқеъӣ дар минтақаи Ширкати алюминии тоҷик низ огаҳ нестед», – изҳор дошт ӯ.
Ба андешаи яке аз муаллифони лоиҳаи қонун, вакили парлумон Олимҷон Сафаров, партовҳои зараровари нақлиёти автомобилӣ ба фазо имрӯз ба яке аз мушкилоти бузург мубаддал гардидааст. «Агар соли 2004 дар Тоҷикистон беш аз 223 ҳазор адад автомобилҳо ба қайд гирифта шуда буданд, пас аввали соли равон шумори онҳо аллакай ба 440 ҳазор адад расидааст», – қайд кард вакил.
Вакилони палатаи поёнии парлумони кишвар аз лоиҳаи қонуни мазкур якдилона ҷонибдорӣ намуданд.
