Зимни вохӯрии имрӯза бо президенти Тоҷикистон Эмомалӣ Раҳмон нахуствазири Ҳиндустон Нарендра Моди аз ӯ дархост хоҳад кард, ки ба кишвараш фурудгоҳи «Айнӣ ба иҷора дода шавад. Ин фурудгоҳ бо кумаки молӣ ва техникии Хиндустон таҷдиду азнавсозӣ шуда, аввали моҳи сентябри соли 2010 расман ба истифода дода шуд. Дар ин бора ВАО-и Ҳиндустон иттилоъ медиҳанд.
Нашрияи Mail Today рӯзи 12 июл бо истинод ба сарчашмаи худ дар ҳукумати Ҳиндустон дар ин робита хабар додааст, ки бар асари фишори Русия, Деҳлӣ фурудгоҳи аз ҳисоби худаш навсозишударо ба иҷора гирифта наметавонад.
«Барои мо бунёди пойгоҳҳои низомӣ дар хориҷи кишвар, аз ҷумла дар Осиёи Марказӣ хеле муҳим аст. Дар масъалаи фурудгоҳи низомии «Айнӣ» қабл аз ҳама Тоҷикистону Русия бояд ба мувофиқа расанд», – зикр кардааст дар мусоҳиба ба Mail Today маршали ҳиндӣ Прадил Васант Найк.
Дар ҳамин ҳол, як манбаъи «Азия-Плюс» дар ҳукумати Тоҷикистон дар мавриди ин масъала қайд кард, ки зимни сафари Ноди ба Душанбе ҷонибҳо ҳамкориҳои Тоҷикистону Ҳиндустон дар бахшҳои амнияту омодакунии кадрҳои ҳарбӣ барои Тоҷикистон дар мактабҳои олии Ҳиндустонро баррасӣ карда, «аммо баррасии масъалаи фурудгоҳи «Айнӣ» дар назар нест».
Як манбаъи «Азия-Плюс» дар Вазорати мудофиаи Тоҷикистон дар ин робита изҳор намуд, ки боздиди нахуствазири Ҳиндустон аз фурудгоҳи «Айнӣ» аз эҳтимол дур нест.
