Ба назар мерасад, ки ташвишҳои васоити ахбори умум оид ба монополия шудани бозори иттилоотии кишвар беасос набудаанд. Президенти Тоҷикистон протоколеро ба имзо расонид, ки мутобиқи он тамоми вазорату идораҳои давлатӣ ҳамаи маълумотро нахуст ба Агентии миллии иттилоотии «Ховар» дода, сипас дигар ВАО ҳам аз он истифода карда метавонанд, вале танҳо бо истинод ба «Ховар».
Дар протоколи рӯзи 30 июн аз ҷониби раиси ҳукумат Эмомалӣ Раҳмон баимзорасида (нусхаи он имрӯз дар ихтиёри ВАО қарор гирифт) зикр мегардад, ки ба ин гуна иттилоот ҳама хабарҳои расмӣ, маълумот дар бораи ҷаласаҳои ҳукумат, сафарҳои кории президент дар дохил ва хориҷи кишвар, вохӯриҳо ва дигар чорабиниҳои сатҳи байнулмилалӣ низ дар дохилу хориҷи кишвар дохил мешаванд.
Қаблан
зимни шарҳи ин маълумот
раиси Анҷумани миллии воситаҳои ахбори оммаи мустақили Тоҷикистон (АМВАОМТ) Нуриддин Қаршибоев ба «Азия-Плюс» изҳор намуда буд, ки сарфи назар аз шакли моликият, қонунгузории ҷумҳурӣ ба дастрасии маълумот ба намояндагони ВАО-и Точикистон ҳуқуқи баробар медиҳад.
«То ҷое, ки ман огаҳӣ дорам, дар муқаррароти «Ховар» зикр шудааст, ки агентӣ ба паҳнкунии маълумоти расмӣ, яъне ба амрҳои президент, қарори ҳукумат ҳуқуқи хосса (эксклюзивӣ) дорад, лекин ба ҳамагон маълум аст, ки муқаррароти агентии давлатии иттилоотӣ аз қонунҳо, ки ба дастрасии маълумот барои ҳамаи ВАО ҳуқуқи баробар медиҳанд, боло нест», – таъкид дошта буд Н.Қаршибоев.
