Суди шаҳри Қӯрғонтеппа автомашинаи боркаши нашъаҷаллобро мусодира кард.
Раиси суди шаҳри Қурғонтеппа Сироҷиддин Сайдалӣ дар ин робита иттилоъ дод, ки суд сокини шаҳри Душанбе, ронандаи автомашинаи боркаши тамғаи «Дулан» Худойбердӣ Каримовро дар содир намудани ҷиноятҳо мутобиқи моддаҳои 200, қ. 3 (Муомилоти ғайриқонунии маводи нашъаовар) ва 289, қ. 3 (Қочоқ)-и КҶ ҶТ гунаҳкор эътироф намуд.
Тавре аз маводи парвандаи ҷиноӣ бармеояд, Х.Каримов ба боркашонӣ тариқи хатсайри Тоҷикистону Афғонистон машғул будааст. Тибқи маълумоти тафтишоти пешакӣ, рӯзи 11 марти соли 2015 ҳангоми дар Афғонистон қарор доштанаш аз он ҷо ба маблағи умумии 1,2 ҳазор доллари ИМА 2 килову 481 грамм маводи мухаддири ҳашиш ва 454 грамм афюн харида, онро дар махфигоҳи автомашинааш пинҳон мекунад.
Дар ҷараёни амалиёти махсуси кормандони Раёсати КДАМ ва Раёсати хадамоти гумруки вилояти Хатлон дар шаҳри Қӯрғонтеппа Х.Кабиров боздошт ва зимни азназаргузаронии автомашинаи ӯ 2 килову 481 грамм маводи мухаддири ҳашиш ва 454 грамм афюн дарёфт мешавад.
Маҳкумшуда ҳамчунин иқрор шудааст, ки маводи мухаддирро дар Афғонистон ӯ бо дархости сокини шаҳри Қӯрғонтеппа Қудратулло Додов харидаст. Кормандони мақомоти ҳифзи ҳуқуқ Қудратулло Додовро низ боздошт намудаанд.
Суд Худойбердӣ Кабировро дар содир намудани ҷиноятҳо мутобиқи модадҳои 200, қ. 3 ва 289, қ. 3-и Кодекси ҷиноии ҶТ гунаҳкор дониста, ӯро ба 12 соли зиндони низомаш шадид бо мусодираи амвол маҳкум кард. Автомашинаи боркаши тамғаи «Дулан»-и маҳкумшуда низ бо ҳукми суд ба нафъи давлат мусодира карда шуд.
Ғайр аз ин, суд Қудратулло Додовро дар содир намудани ҷиноят мутобиқи моддаҳои 201, қ. (Муносибати ғайриқонунӣ бо воситаҳои нашъадор ё моддаҳои психотропӣ), 36, қ. 1 (Шарикони ҷиноят) ва 289, қ. 2 (Қочоқ)-и Кодекси ҷиноии ҶТ гунаҳкор эътироф намуда, ӯро ба 5,6 соли зиндони низомаш шадид маҳкум кард.
