Ширкати NORINCO International Cooperation Ltd-и Чин сохтмони Маркази барқу гармидиҳӣ (МБГ) дар ноҳияи Раштро дар нақша дорад.
Дар доираи кори форуми байнулмилалии соҳибкорон «Душанбе-2015», ки рӯзи 14 октябр доир мегардад, ин ширкати Чин бо Кумитаи давлатии сармоягузорӣ ва идораи амволи давлатии Тоҷикистон дар ин хусус озишномаи дахлдор ба имзо мерасонад.
Бино ба маълумоти Кумитаи давлатии сармоягузорӣ ва идораи амволи давлатии Тоҷикистон, МБГ дар ноҳияи Рашт аз ду деги энергетикӣ бо иқтидори умумии 350 мегаватт иборат хоҳад буд, ки тибқи ҳисобу китоби энергетикҳо, ба истеҳсоли ҳудуди 8,7 млн. кВт/соат нерӯи барқ дар як шабонарӯз баробар аст.
Дар назар аст, ки ин марказ ба сифати сӯзишворӣ аз ангишт истифода хоҳад кард. Дар бораи ҳаҷми маблағгузорӣ ба сохтмони иншооти мазкур аз ҷониби ширкати Чин алҳол маълумот дастрас нест.
Қобили зикр аст, ки ширкати Tabian Apparatus Stoc Co. (ТВЕА)-и Чин дар шаҳри Душанбе ба сохтмони МБГ «Душанбе-2» бо иқтидори 300 МВт машғул аст. Навбати аввали ин иншоот моҳи январи соли 2014 ба истифода дода шуда, бунёди навбати дуюми он баҳори соли равон оғоз ва анҷоми он соли 2017 дар назар аст.
Айни замон дар Тоҷикистон ба ҷуз МБГ «Душанбе-2», танҳо дар Душанбе ва Ёвон боз ду Маркази барқу гармидиҳии дигар мавҷуданд, ки сӯзишвории асосии онҳо гази табиӣ аст. Дар робита ба камбуди гази табиӣ, МБГ Душанбе бо иқтидори нопурра кор карда, МБГ Ёвон тайи солҳои охир умуман фаъолият намекунад.
