Рӯзҳои 14-16 октябр дар маҷмааи давлатии «Кохи Борбад»-и шаҳри Душанбе Намоишгоҳи сеюми байнулмилалии кишоварзӣ, саноати хӯрокворӣ ва борбандии Agrofood-2015 баргузор мешавад, ки аз ҷониби Expo Central Asia ва Палатаи савдо ва саноати Тоҷикистон (ПСС ҶТ) созмон дода мешавад.
Тавре ба «Азия-Плюс» аз ПСС Тоҷикистон дар ин робита иттилоъ доданд, ҳадаф аз баргузории намоишгоҳ фароҳам овардани имконоти нави фурӯш, дарёфти шарикони нав ва ба бозор роҳ ёфтани маҳсулоту хизматгузориҳои нав аст.
Дар намоишгоҳ пешниҳоди техника ва таҷҳизоти бахши кишоварзӣ, тухмиву ниҳолҳо, технологияҳои обёрӣ ва ғизодиҳӣ бо нуриҳои минералӣ, маҳсулот ва таҷҳизоти боғдориву гулпарварӣ дар назар аст.
Ҳамчунин маҳсулоти шириву гӯштӣ ва моҳӣ, сабзавоту мева ва консерваҳо, маснӯотӣ нонӣ ва қаннодӣ, нӯшокиҳои ғайримашруботӣ ва таҷҳизоти касбӣ барои ошхонаҳо низ ба маърази тамошову фурӯш гузошта мешавад.
Ғайр аз ин, тамошогарони намоишгоҳ метавонанд бо таҷҳизоту технологияҳои коркарди маводи ғизойӣ, борбандӣ ва таҷҳизоти он, ҳамчунин таҷҳизот барои коркарди шир аз наздик ошно гарданд.
