Рӯзҳои 14-16 октябр дар маҷмааи давлатии «Кохи Борбад»-и шаҳри Душанбе Намоишгоҳи сеюми байнулмилалии кишоварзӣ, саноати хӯрокворӣ ва бастабандии Agrofood-2015 баргузор мешавад, ки дар он маҳсулоти беш аз 60 ширкати қораи Осиё ва Аврупо ба маърази тамошо ва фурӯш гузошта мешавад.
Тавре ба «Азия-Плюс» аз Палатаи савдо ва саноати Тоҷикистон (ПСС ҶТ) дар ин робита иттилоъ доданд, дар намоишгоҳ пешниҳоди маҳсулоти саноати хӯрокворӣ, комплекси агросаноатӣ, техника ва таҷҳизоти бахши кишоварзӣ аз ширкатҳои Тоҷикистону Ӯзбекистон, Гурҷистон, Италия ва Испания, Ҳолланд, Словения, Олмону Русия, Беларус, Озарбойҷон, Қазоқистону Қирғизистон ва Эрону Туркия дар назар аст.
Дар намоишгоҳ техника ва таҷҳизоти бахши кишоварзӣ, тухмиву ниҳолҳо, технологияҳои обёрӣ ва ғизодиҳӣ бо нуриҳои минералӣ, маҳсулот ва таҷҳизоти боғдориву гулпарварӣ пешкаш мегардад.
Ҳамчунин маҳсулоти шириву гӯштӣ ва моҳӣ, сабзавоту мева ва консерваҳо, маснӯотӣ нонӣ ва қаннодӣ, нӯшокиҳои ғайримашруботӣ ва таҷҳизоти касбӣ барои ошхонаҳо низ ба намоиш гузошта мешавад.
Ғайр аз ин, тамошогарони намоишгоҳ метавонанд бо таҷҳизоту технологияҳои коркарди маводи ғизойӣ, бастабандӣ ва таҷҳизоти он, ҳамчунин таҷҳизот барои коркарди шир аз наздик ошно гарданд.
Қобили зикр аст, ки намоишгоҳи мазкур аз ҷониби Палатаи савдо ва саноати Тоҷикистон дар ҳамдастӣ бо ширкати Expo Central Asia бо дастгирии ҳукумати Тоҷикистон созмон дода мешавад.
