Кумитаи забон ва истилоҳоти назди ҳукумат дар ҳамдастӣ бо Академияи илмҳои Тоҷикистон рӯйхати ягонаи номҳои тоҷикиро мавриди таҳия қарор додаанд.
Аз Вазорати адлияи ҷумҳурӣ ба «Азия-Плюс» дар ин робита иттилоъ доданд, ки баъди мавриди амал қарор гирифтни тағйироту иловаҳо ба қонун «Дар бораи бақайдгирии давлатии асноди ҳолати шаҳрвандӣ», ҳукумат низ ин рӯйхатро қабул мекунад. Маҳз мутобиқи ин рӯйхат ва берун нарафтан аз чаҳорчӯби он шаҳрвандони Тоҷикистон ба тифлони навзоди худ ном мегузоранд.
Шумори номҳо дар рӯйхат алҳол саҳеҳан маълум нест, вале манбаъ аз аз эҳтимол дур намедонад, ки он беш аз 3 ҳазорро ташкил хоҳад дод.»Ба мо гуфтанд, ки рӯйхати номҳо аллакай омода аст, вале онро ба мо баъди қабул шудани тағйироту иловаҳо ба қонун пешниҳод мекунанд», – иброз дошт манбаъ.
Дар ҳамин ҳол, ба шаҳрвандони миллати ғайритоҷик дар ҷумҳурӣ ҳуқуқ дода мешавад, ки мутобиқи анъанаҳои миллии худашон барои тифлонашон ном интихоб кунанд.
Зимнан зикр гардид, ки дар шуъбаҳои сабти асноди ҳолати шаҳрвандии кишвар мудддати тӯлониест, ки китобчаи номҳои тоҷикӣ барои кӯдакон мавҷуд аст ва кормандони шуъба ба волидони кӯдак интихоби ном аз онро пешниҳод мекунанд, вале ин тартиб танҳо хусусияти тавсиявӣ дорад. Акнун шаҳрвандон уҳдадор мешаванд, ки тифлонашонро танҳо мутобиқи номҳои дар рӯйхат зикршуда номгузорӣ кунанд.
Нисбати шахсоне, ки дар ному насабашон решаҳои тоҷикӣ вуҷуд надоранд, дар Вазорати адлия қайд карданд, ки агар худи онҳо хостори ивази ному насабашон набошанд, ҳеҷ касе онҳоро ба ин кор маҷубур намекунад.
Ҳамчунин хотиррасон шуд, ки чунин қонун аллакай кайҳост, ки дар Эстония, Дания ва Шветсия қабул шуда, дар Русия алҳол мавриди таҳия қарор дорад.
Ёдрас мекунем, ки санаи 30 ноябр палатаи поёнии парлумони ҷумҳурӣ
ба омӯзиши тағйироту иловаҳои
пешниҳодшуда аз ҷониби ҳукумат ба қонун «Дар бораи бақайдгирии давлатии асноди ҳолати шаҳрвандӣ» шурӯъ намуд.
