– Муҳоҷирати корӣ аз Тоҷикистон ба Русия имрӯз натанҳо аз роҳи ноилоҷиву маҷбур сурат мегирад, балки он барои тоҷикон як эътиборе пайдо кардааст, – чунин мешуморанд таҳлилгарони Бонки авруосиёии рушд (БАОР).
«Сабаби аслии муҳоҷират зарурати кор кардани маблағ барои хароҷоти рӯзмарраи оила ва харидории маҳсулоти муҳлати истифодаашон дарозмуддат, сохтмони манзил, баргузор кардани тӯйҳо ва табобати хешовандону наздикон аст», – қайд мешавад дар
гузориши
БАОР таҳти унвони «Муҳоҷирати корӣ ва соҳаҳои меҳнатталаб дар Тоҷикистон ва Қирғизистон: имконот барои рушди инсонӣ дар Осиёи Марказӣ».
Дар гузориш зикр мегардад, ки аксари муҳоҷирони кории тоҷик ба тамоми умр дар Русия монданро хоҳиш надоранд, аммо муҳоҷирати кории дарозмуддат ва такрорӣ дар ҳар мавсимро ихтиёр мекунанд.
Таъкид мешавад, ки муҳоҷирони тоҷик барои кор дар Русия бештар шаҳрҳои бузурге чун Маскаву Екатеринбург ва Санкт-Петербургро интихоб менамоянд.
Коршиносони БАОР бо истинод ба созмони Лигаи халқӣ «Тоҷикон» қайд мекунанд, ки дар Русия ҳудуди 1,5 млн. нафар шаҳрвандони Тоҷикистон зиндагӣ доранд, ки аз ин шумор танҳо 700-800 ҳазор нафарашон машғули коранд.
«Тоҷикистон кишвари аз ҳама бештар вобаста ба интиқоли маблағҳо аз хориҷи мамлакат аст: муҳоҷирон ба ватан наздики 48% аз ҳаҷми Маҷмӯи маҳсулоти дохилӣ (ММД)-и кишвар (World Bamk, 2013) маблағ интиқол медиҳанд. Ба қавли роҳбари Лигаи халқӣ «Тоҷикон»Каромат Шарипов, дар баробари ин ҳаҷми маблағҳои интиқолдода ҳамагӣ 13% аз ҳаҷми умумии даромадҳои онҳоро ташкил дода, дигар ҳамаи маблағи боқимонда дар Русия мемонад ва ба таъмини маишату рӯзгори худи муҳоҷирон масраф мешавад», – таъкид мешавад дар ин гузориш.
Дар ҳамин ҳол, бино ба
маълумоти
Хадамоти федералии муҳоҷирати Русия, ба санаи 4 декабри соли равон 896 ҳазор нафар шаҳрвандони Тоҷикистон дар қаламрави Русия қарор доштаанд, ки нисбат ба аввали сол тақрибан 103 ҳазор нафар камтар аст.
