– Маркази ягонаи коммуникатсионӣ ба он хотир таъсис дода шуд, ки алоқаи барқӣ аз ҷониби созмонҳои террористиву ифротгаро истифода нашавад, – изҳор дошт зимни нишасти хабарӣ Назар Одиназода, муовини аввали раиси Хадамоти зиддиинҳисории Тоҷикистон.
Ёдрас мекунем, ки соли 20006 дар баҳси Хадамоти зиддинҳисорӣ бо Хадамоти алоқаи ҷумҳурӣ (он замон Вазорати алоқа) ҳукумати кишвар нияти аз ҷониби Вазорати алоқа таъсис додани Маркази ягонаи коммуникатсионӣ ва дастгоҳи дастрасӣ ба захираҳои иттилоотиро ғайриқобили қабул ва мухолиф ба қонунгузории Тоҷикистон эътироф карда буд.
«Ҳукумати ҶТ бори дигар сиёсати худ баҳри рушди соҳибкории озод дар бахши алоқаи барқӣ дар шароити рақобати мунсифона ва роҳ надодан ба монополия дар ин бахшро тасдиқ кард», – зикр гардида буд соли 2006.
Ба гуфтаи Одиназода, аммо имрӯз Маркази ягонаи коммуникатсионӣ ба хотири таъмини амнияти кишвар таъсис дода мешавад. «Маркази мазкур барои субъектҳои машғул ба фаъолият дар соҳаи алоқаи барқӣ ҳеҷ маҳдудияте ҷорӣ намекунад. Фаъолияти ин марказ аз ҷониби хадамоти зиддиинҳисорӣ назорат мешавад. Ҳамаи нархҳо бо мо мувофиқа мешаванд. Ин марказ танҳо зангҳои вуруд ва хурӯҷи алоқаи барқиро ба хотири таъмини амният назорат мекунад», – қайд кард Н.Одиназода.
Қобили зикр аст, ки нимаи моҳи январ ҳукумати Тоҷикистон қарор «Дар бораи Маркази ягонаи коммуникатсионии алоқаи барқӣ»-ро
ба тасвиб расонид
. Дар матни қарор, ки дар нашрияи ҳукумат
«Ҷумҳурият»
интишор шудааст, гуфта мешавад, маркази мазкур «бо мақсади таъмини назорат ва танзими трафикҳои воридотию содиротии хизматрасониҳои байналмилалии алоқаи барқӣ ва интернет ташкил карда мешавад».
