Дар доираи размоиши низомии артишҳои Тоҷикистону Русия хизматчиёни ҳарбии воҳиди иктишофӣ (разведка) ва тирандозони пойгоҳи низомии 201-уми Русия дар Тоҷикистон дар ҳамдастӣ бо низомиёни воҳиди таъиноти махсуси Қувваҳои Мусаллаҳи Тоҷикистон дастаи бузурги шартии ғайриқонунии мусаллаҳро дар доманакӯҳи Помири Шарқӣ нобуд карданд.
Ба қавли намояндаи расмии Ҳавзаи марказии низомии Русия Ярослав Рошупкин, дар ҷараёни баргузории амалиёт хизматчиёни ҳарбии ҳарду кишвар амалҳои муштараки тактикӣ оид ба ошкор намудан, ба муҳосира гирифтан ва нобуд кардани ҷангиёни шартиро, ки кӯшиши тасарруфи маҳаллаи аҳолинишини баландкӯҳ ва гаравгонгирии сокинони онро доштанд, ба иҷро расониданд.
«Бо дастгирии авиатсия ва техникаи зиреҳпӯш, истифода аз шароитҳои релефи кӯҳӣ ва ҳамчунин омили ногаҳонӣ, ба воҳидҳои низомии муштарак муяссар шуд, ки ин гурӯҳи ғайриқонунии мусаллаҳро муҳосира ва нобуд созанд», – қайд кардааст Рошупкин.
Гуфта мешавад, дар ин амалиёт аз ҳарду ҷониб беш аз 200 нафар хизматчиёни ҳарбӣ иштирок карда, ҳамчунин ҳудуди 20 адад техникаи низомӣ ва махсус сафарбар шудааст.
