Имрӯз дар оташдони махсуси Агентии назорати маводи нашъаовар (АНМН)-и назди президенти ҶТ бо тартиби дар қонунгузорӣ муқарраргардида маросими нобуд кардани воситаҳои нашъадор доир гардид.
Тавре сухангӯи Агентӣ Хушунд Раҳматуллоев дар ин робита иттилоъ дод, дар ҳузури комиссия аз ҳисоби кормандони мақомоти ҳифзи ҳуқуқ ва судӣ, инчунин бо иштироки намояндагони васоити ахбори оммаи ватанӣ ва хориҷӣ 374 килою 045 грамм маводи нашъаовар сӯзонида шуд.
Ҳамаи маводи мухаддири нобудшуда ба сифати далели шайъӣ дар 31 парвандаи ҷиноӣ истифода шудаанд, ки нисбати онҳо ҳукми суд мавриди амал қарор гирифтааст.
Бино ба гуфтаи манбаъ, маводи мухаддири нобудшуда аз 16 килою 452 грамм героин, 161 килою 699 грамм афюн, 107 килою 511 грамм ҳашиш, 88 килою 376 грамм маводи нашъаовари гурӯҳи каннабис ва 21 дона ҳаби МДМА иборат буд.
Ин миқдор маводи мухаддир зимни амалиёти фаврӣ-ҷустуҷӯии кормандони АНМН, Кумитаи давлатии амнияти миллӣ ва Хадамоти гумруки ҷумҳурӣ дарёфт ва мусодира шудааст.
Зимнан зикр гардид, ки давоми фаъолияти Агентӣ дар оташдонҳои он беш аз 15 тонна маводи мухаддири навъҳои гуогун сӯзонида шудаанд.
