Ширкатҳои мобилии Tcell ва Beeline дар ҳамдастӣ бо фонди «Ормон» рақами ягонаи 1519-ро роҳандозӣ ва фаъол намуданд, ки бо ирсоли воситаву маблағ тариқи он ба кӯдакони гирифтори бемории вазнин ва маъюбон кумак кардан имкон дорад. Ирсоли 1 SMS ба он 1 сомонӣ арзиш дорад.
Фонди хайрияи «Ормон» соли равон дар доираи барномаи писандидаи ҳамноми он дар ширкати телевизиону радиои «СМ-1» (вилояти Суғд) таъсис дода шудааст.
Дар мусоҳиба ба «Азия-Плюс» рӯзноманигор ва муассиси фонд Парвина Азизова изҳор дошт, ки фонд баҳри кумак ба муаллифони номаҳои навмеду маъюсона, ки ба идораи ширкат ворид мешаванд, бунёд шудааст.
«Мо аз шахсоне нома мегирем, ки дар вазъияти ноилоҷ мондаанд, масалан онҳо барои муолиҷаи кӯдак пул надоранд ё бинобар мушкилоти солимӣ ҳаёташон зери хатар қарор гирифтааст. Дар ин ҳолатҳо хоҳиши аз ҳама аввал кумаку бепарво набудани атрофиён ба ин мушкилот аст. Фонди мо ба бисёре аз муҳтоҷон кумак карда, ин ба идомаи кор рӯҳу илҳом мебахшад. Аз ҳамаи касоне, ки моро дастгирӣ мекунанду аз мушкилоти афроди бегона худро канор намегиранд, миннатпазирем», – қайд кард П.Азизова.
Ба гуфтаи ӯ, рақами кӯтоҳи 1519-ро барои фонди «Ормон» Хадамоти алоқаи ҷумҳурӣ бепул танҳо барои фаъолияти хайрия ҷудо карда, хизматгузориҳои техникии ширкатҳои Tcell ва Beeline низ ройгон пешниҳод мешаванд.
«Дар навбати худ ширкати телевизиону радиои «СМ-1» ва фонди хайрияи «Ормон» кафолат медиҳанд, ки ҳамаи маблағу воситаҳои тариқи ин иқдом бадастомада барои муоилиҷаи кӯдакони бемору маъюбон масраф хоҳанд шуд», – афзуд П.Азизова.
Дар сомонаи ширкати телевизиону радиои «СМ-1» –
www.cm-1.tv
дар бораи кумакҳои алллакай расида ба шахсон ва ҳамчунин афроде, ки бениҳоят ба чунин кумакҳо ниёз доранд, маълумот дарёфт кардан мумкин аст.
