Бонки Эсхата ният дорад, ки бо миёнаравии ширкати брокерии «Прайм инвест» нашри нахусти вомбаргҳо (облигатсияҳо)-и гурӯҳӣ (корпоративӣ)-ро ба роҳ монда, онҳоро дар платформаи Биржаи фондии Осиёи Марказӣ ҷой диҳад.
Раиси Раёсати ҶСК «Бонки Эсхата» Хуршед Носиров имрӯз зимни кори форуми сармоягузорӣ тахти унвони «Имконоти нав барои рушд» дар Душанбе дар ин робита изҳор намуд, ки бонк ният дорад, ки ба миқдори 200 ҳазор дона ба маблағи 20 млн. бо арзиши 100 сомонӣ вомбаргҳо нашр намояд, ки меъёри солонаи вомбаргҳо 22%-ро ташкил дода, муҳлати гардишаш 2 сол аст.
Х.Носиров зикр кард, ки фурӯши коғазҳои қиматнок тариқи Биржаи фондии Осиёи Марказӣ роҳандозӣ мешавад.
Ба андешаи сарёвари президенти ҶТ оид ба масоили иқтисодӣ Завқӣ Завқизода, нашри нахусти вомбаргҳои гурӯҳӣ дар таърихи Тоҷикистон ба рушди соҳибкорӣ дар ҷумҳурӣ ва ҷалби сармоягузорӣ ба иқтисоди кишвар мусоидат мекунад.
Вомбарг коғази қиматноке мебошад, ки ӯҳдадории эмитентро дар бобати ба соҳиби коғази қиматнок дар мӯҳлати муқарраргардида талофӣ намудани арзиши исмии он бо пардохти фоизи муайяншуда тасдиқ мекунад (агар дар шартҳои барориш чизи дигаре пешбинӣ нашуда бошад).
