Дар рӯзи дуюми сафари корӣ ба ноҳияи Данғара Президенти Тоҷикистон Эмомалӣ Раҳмон дар маркази шаҳрак Донишгоҳи давлатии Данғараро дар вазъияти тантанавӣ мавриди истифода қарор дод.
Бино ба иттилои хадамоти матбуоти сарвари давлат, сохтмони бинои муҳташами донишгоҳи аз моҳи марти соли 2008 оғоз шуда буд ва бо харҷи 177,5 млн. сомонӣ қомат афрохт. Донишгоҳ барои таҳсили 4 ҳазор нафар донишҷӯ дар як баст бунёд шудааст. Айни ҳол дар ин ҷо 2615 донишҷӯ аз ВМКБ, вилоятҳои Суғду Хатлон ва ноҳияҳои тобеи марказ ба таҳсил фаро гирифта шудаанд.
Донишгоҳ аз 17 бино, аз ҷумла 2 хобгоҳи 9 – ошёна бо 1300 ҷойи хоб барои донишҷуён, 3 бинои истиқоматии 5 ошёна бо 60 ҳуҷра барои омӯзгорон, толори варзишгоҳ бо 450 ҷойи нишаст, толори зебову мунаққаши фарҳангӣ бо 530 ҷойи нишаст, ошхона бо 300 ҷойи нишаст, китобхона барои нигаҳдории 650 ҳазор адад китоб ва дигар иншооти ёрирасон иборат аст.
Аз оғози соли таҳсили 2016-2017 дар 6 факулта ва 20 кафедра аз рӯи ихтисоси педагогика ва технологияҳои таълимотии муосир, иқтисодиёти инноватсионӣ ва менеҷмент, аграрӣ ва истифодаи захираҳои табиӣ, муҳандисӣ ва технологияи муосири истеҳсолӣ, идораи давлатӣ ва ҳуқуқ ва ғайра мутахассис тайёр карда мешавад.
