Энергетикҳои тоҷик аз анҷоми мавсими гармидиҳӣ дар шаҳри Душанбе хабар доданд, ки аз охири моҳи октябри соли гузашта оғоз гардида буд.
Аз ширкати «Барқи тоҷик» ба «Азия-Плюс» иттилоъ доданд, ки аз 1 март кори Марказҳои барқу гармидиҳии пойтахт боздошта шудааст.
Қобили зикр аст, ки дар Маркази барқу гармидиҳии «Душанбе-2» шабонарӯзӣ то 9 млн. кВт/соат нерӯи барқ истеҳсол мешуд.
«Аз фаъолият бозмондани Марказҳои барқу гармидиҳӣ ба таъмини аҳолӣ бо нерӯи барқ таъсир намекунад, зеро дар обанборҳо захираи кофии об мавҷуд аст, ки то интиқоли барқ дар ҳаҷми пурра таъмин шавад, – гуфтанд дар ширкат. – Ғайр аз ин, маҷрои устувори об дар дарёҳои кишвар низ ба ин мусоидат мекунад».
