Суди шаҳри Санкт-Петербурги Русия рад кардани оғози парвандаи ҷиноиро оид ба аз шаҳрванди Тоҷикистон Заррина Юнусова гирифтани тифли 5-моҳааш Умаралӣ Назаров, ки баъдан дар маркази махсуси тиббӣ ҳалок шуд, қонунӣ эътироф кард.
Нашрияи «Коммерсант» дар ин робита менависад, модари тифл қаблан барои риоя накардани қонунгузории муҳоҷират аз Русия ихроҷ шуда буд, вале адвокатҳои ӯ ба он исрор меварзанд, ки аз модар ҷудо кардани кӯдак ғайриқонунӣ сурат гирифтааст. Намояндагони оилаи ҷабрдида ба Суди ҳуқуқи башари Аврупо шикоят бурданианд.
Охири моҳи октябри соли гузашта дар робита ба ин ҳодиса котиби матбуотии ВКД Тоҷикистон Умарҷони Эмомалӣ изҳор намуда буд, ки дар ВКД Тоҷикистон аз рӯи парвандаи Умаралӣ Назаров ҳеҷ тафтишоте сурат нагирифтаааст, зеро «ин ҳодисаи нохуш дар Русия рух дода, парвандаи ҷиноӣ ҳам дар ҳамон ҷо боз шуд ва аз рӯи як далел ду парвандаи ҷиноӣ боз намешавад».
Ёдрас мекунем, ки кӯдаки 5-моҳаи муҳоҷирон аз Тоҷикистон Заррина Юнусова ва Рустам Назаров – Умаралӣ Назарови 5-моҳа ҳангоми рейди кормандони Хадамоти федералии муҳоҷират дар шаҳри Санкт-Петербург субҳи рӯзи 13 октябри соли 2015 аз модараш гирифта шуда, баъди чанд соат аз ҷониби кормандони пулис ба бемористони кӯдаконаи ба номи Симбалин фиристода шуд ва нимашаби ҳамон рӯз дар ин бемористон фавтид. Аз рӯи ин далел парвандаи ҷиноӣ боз шуда буд.
Дар ҷараёни санҷиши хидматӣ ВКД ба хулоса расид, ки мақомоти ҳифзи ҳуқуқ дар ин ҳолат аз рӯи қонун амал кардаанд, вале дигар ниҳодҳо мақомоти пулисро дар ин ҳодиса гунаҳкор донистанд.
Ғайр аз ин, нахуствазири Русия ба президенти Тоҷикистон Эмомалӣ Раҳмон ваъда дода буд, ки ҳодисаи марги кӯдаки тоҷик дақиқан мавриди тафтиш қарор дода хоҳад шуд.
Нашрияи «Новая газета хабар дода буд, ки суди Невскии шаҳри Санкт-Петербург беамалии мақомоти тафтишот дар ҷараёни таҳқиқи марги тифли панҷмоҳа аз Тоҷикистон Умаралӣ Назаровро ғайриқонунӣ эътироф кард.
Қобили зикр аст, ки сокинони шаҳри Санкт-Петербург дар майдони Марсово гирдиҳам омада маросими ёдбуди марги тифли тоҷик Умаралӣ Назаровро баргузор намуданд. Дар ин ҳамоиш 30 нафар ширкат варзида, ба хотири тифл бо номи «Умаралӣ»шамъ фурӯзон карданд.
