Дар бозори ҶДММ “Достӣ”-и пойтахт аз як соҳибкор аз шаҳри Истаравшан як миқдор сарулибоси мактабӣ мусодира шуд, ки кормандони гумрук онро ғайриқонунӣ аз Ӯзбекистон воридшуда арзёбӣ мекунанд.
Бино ба маълумоти Хадамоти гумруки назди ҳукумати ҶТ, зимни баргузории як рейд дар бозорҳои фурӯши либосворӣ, як миқдор сарулибоси мактабӣ ошкор гардидааст, ки бидуни ҳуҷҷатгузории гумрукӣ ба фурӯш гузошта шудааст.
Муайян карда шудааст, ки сокини 35-солаи шаҳри Истаравшан дар фурӯшгоҳи худ дар бозори “Достӣ” ба фурӯши сарулибоси мактабие машғул будааст, ки эъломияҳои гумрукӣ надоштаанд. Аз дӯкони соҳибкор 104 баста либосҳои мактабии кӯдаконаи истеҳсоли Ӯзбекистон дарёфт шудааст.
Дар вақти пурсиш муайян гардидааст, ки ин либосҳои кӯдаконаи мактабиро номбурда аз бозорҳои либосфурӯшии вилояти Суғд барои фурӯш дар бозори «Корвон»-и шаҳри Душанбе аз соҳибкорони ба ӯ ношинос бе ҳуҷҷатҳои воридотии гумрукӣ харидорӣ намудааст.
Гуфта мешавад, бо ин ҳаракатҳои худ соҳибкор ба қонуншиканӣ роҳ додааст, ки ҷавобгарии маъмурии он дар моддаи 597-и Кодекси ҳуқуқвайронкунии маъмурии ҶТ ҷавобгарии маъмуриро барои харидан, нигоҳ доштан, интиқол додан, ҳамлу нақл, истифодабарӣ ва мусоидат ба фурӯши моли бидуни назорати гумрукӣ воридшударо пешбинӣ шудааст.
Зикр мегардад, ки аз рӯи ҳолати мазкур нисбати соҳибкор бо моддаи 597-и Кодекси ҳуқуқвайронкунии маъмурии ҶТ парвандаи ҳуқуқвайронкунии маъмурӣ оғоз гардида, ба Суди ноҳия Фирдавсии шаҳри Душанбе ирсол карда шуд.
