Бонки марказии Ӯзбекистон (БМӮ) бори нахуст дар таърихи худ қурби сӯми ӯзбекиро нисбати арзи миллии Тоҷикистон – сомонӣ эълон кард.
Бино ба маълумоти сомонаи расмии БМӮ, қурби табодули як сомонии Тоҷикистон 920,45 сӯми ӯзбекӣ муқаррар шудааст.
Ҳамчунин Бонки марказии ин кишвар қурби сӯми ӯзбекӣ нисбати арзи миллии кишварҳои Осиёи Марказиро низ муайян кардааст, ки тариқи зайл аст: 1 тангаи Қазоқистон – 23,9; 1 соми Қирғизистон – 117,68 ва 1 манати Туркманистон – 2320,92 сӯми Ӯзбекистон.
Бино ба иттилои сомонаи Бахши хабарии Осиёи Марказӣ, БМӮ қурби як доллари амрикоиро сар аз 5 сентябр дар баробари пули миллии ин кишвар 8 ҳазору 100 сӯм муайян кард, ки нисбат ба қурби ҳафтаи ахир (4210,35 сӯм) 3 ҳазору 889,65 сӯм бештар аст.
"Бар пояи таҳлили омилҳои муайянкунандаи қурби асъор барои солҳои 2003-2017 ва бо назардошти натоиҷи муомилоти санҷишии бонкҳо бо асъори хориҷӣ қурби як доллари амрикоӣ дар кишвар 8000-8150 сӯм муайян карда шуд", – омадааст дар иттилоияи БМӮ.
Бонки миллии Ӯзбекистон арзиши сӯмро дар баробари асъори хориҷии дигар низ поин бурдааст. Қурби як евро 9645,48 сӯм муайян шудааст, ки нисбат ба қурби ҳафтаи гузашта 4678,601 сӯм зиёд аст. Арзиши як рубли русӣ то ба 139,91 сӯм боло бурда шудааст.
"Бонки миллӣ минбаъд ҳар рӯзи душанбе қурби миёнаи асъори хориҷиро муайян мекунад, ки барои умури ҳисобдорӣ, гузоришҳои оморӣ ва муомилоти асъори хориҷӣ, пардохтҳои гумрукию боҷҳои ҳатмии дигар дар ҳудуди Ӯзбекистон истифода хоҳад шуд", – афзудааст БМӮ.
Қурби сӯм баъди ба имзо расидани фармони президенти Ӯзбекистон "Дар бораи чораҳои аввалия барои озодсозии сиёсати пулӣ" аз 2 сентябр якбора поин бурда шуд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
