Вазири корҳои хориҷии Эрон Муҳаммадҷавод Зариф субҳи имрӯз ба Душанбе омад. Манбаъҳои «Азия-Плюс» аз Фурудгоҳи байнулмилалии Душанбе доир ба фуруд омадани ҳавопаймо бо намояндаи воломақоми Эрон хабар доданд.
Аммо Вазорати корҳои хориҷии Тоҷикистон аз масъалаи шарҳи ҳадафҳои сафари мансабдори воломақоми Эрон ба ҷумҳурӣ худдорӣ меварзад.
Қаблан хабаргузории эронии Fars ҳадафи аслии сафари Муҳаммадҷавод Зарифро ифтитоҳи бинои нави сафорати Эрон дар Тоҷикистон унвон карда, ҳамчунин зикр гардида буд, ки дар ҷараёни сафар вохӯрии ӯ бо президенти Тоҷикистон Эмомалӣ Раҳмон тарҳрезӣ шудааст, лекин муяссар нагардид, ки тасдиқи ин хабар аз ҳукумат дарёфт шавад.
Дар ин сафар Муҳаммадҷавод Зарифро вазири энергетика ва масъалаҳои захираҳои оби Эрон Ризо Ардакониён ҳамроҳӣ мекунад.
Ёдрас мекунем, ки моҳи апрели соли равон вазири корҳои хориҷии Эрон аз кишварҳои минтақаи Осиёи Марказӣ, аз ҷумла Туркманистон, Қирғизистон ва ҳамчунин Гурҷистон боздид нмуда, вале ба Тоҷикистон ташриф наовард, ҳарчанд ВАО-и Эрон дар ин бора хабар дода буданд.
Қобили зикр аст, ки охири соли 2015, баъди ба конфронси байнулмилалӣ ба Теҳрон даъват шудани раиси Ҳизби фаъолияташ дар Тоҷикистон манъшудаи наҳзати исломӣ Муҳиддин Кабирӣ муносибатҳои Тоҷикистону Эрон ба сардӣ гаравиданд.
Баъди чанде ҳукуматдорони Тоҷикистон воридоти маҳсулоти Эронро маҳдуд, фаъолияти чанде аз ширкатҳои хурду бузургиро эрониро боздошт ва пешниҳоди раводиди имтиёзнок ба шаҳрвандони Эрон дар фурудгоҳи Душанберо қатъ карданд.
Нуқтаи авҷи сардшавии муносибатҳо намоиши филми мустанади аз ҷониби ВКД Тоҷикистон таҳияшуда дар телевизиони Тоҷикистон доир ба маблағгузории Эрон ба куштори пурсарусадоҳо солҳои ҷанги шаҳрвандӣ дар Тоҷикистон гардид.
Дар навбати худ сафорати Эрон дар Тоҷикистон изҳор намуд, ки намоиши ин филм ба манфиатҳои мардуми кишварҳо ҷавобгӯ набуда, ба муносибатҳои дӯстона миёни Тоҷикистону Эрон ҷудоӣ андохта наметавонад.
Чанде қабл корманди Маркази исломшиносии назди Президенти Тоҷикистон, номзади илмҳои фалсафа Қамар Нурулҳақов Эронро ба таҳмили ақидаи динии худ ва кӯшиши содироти инқлоби исломӣ ба Тоҷикистон муттаҳам кард.
Дар мақолаи худ дар сомонаи расмии ин Марказ таҳти унвони «Шиагароӣ: идеология ва амалияи он» ӯ қайд меунад, ки дар баланд рафтани нақши «омили исломӣ» ва хусусияти глобалӣ касб кардани раванди сиёсисозии ислом дар охири садаи XX ва ибтидои садаи XXI таъсири «Инқилоби исломӣ»-и Эрон хеле калон аст.
Дар қисмати дуюми мақола ӯ менависад, баъд аз ғалабаи «инқилоби исломӣ» роҳбарияти Эрон кӯшишҳои зиёд ба харҷ дод, ки ин инқилобро ба кишварҳои дигари мусулмонӣ интиқол диҳад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
