Бо хатсайри махсуси ширкати миллии ҳавопаймоии Ӯзбекистон – «Ӯзбекистон ҳаво йуллари» беш аз 100 нафар сарояндагону раққосон ва мусиқачиёни ӯзбек ба Душанбе омаданд.
Онҳо дар консерт таҳти унвони «Шоми дӯстӣ», ки рӯзи 9 март бо иштироки сарони кишварҳои Тоҷикистону Ӯзбекистон Эмомалӣ Раҳмон ва Шавкат Мирзиёев дар маҷмааи «Кохи Борбад» доир мегардад, иштирок мекунанд.
Дар бораи ташрифи ҳунармандони ӯзбек ба Душанбе ба «Азия-Плюс» аз Вазорати фарҳанги ҷумҳурӣ хабар дода, ҳамчунин зикр карданд, ки дар ин консерт аз ҷониби Тоҷикистон иштироки 150 нафар сарояндагону раққосон ва мусиқачиён дар назар аст.
Ба гурӯҳи ҳунармандони Ӯзбекистон дар ин консерт аз ҷумла Ҳунармандони халқии Ӯзбекистон Юлдуз Усмонова, Шералӣ Ҷӯраев, Фаррух Зокиров, Озодбек Назаров ва дигарон шомил шудаанд.
Тавре пешбинӣ мешавад, Тоҷикистонро дар ин консерт ҳунармандони маъруф Давлатманд Холов, Нигина Амонқулова, сарояндаи опера Рустам Дулоев, сароядагони «Шашмақом» ва дастаҳои рақсӣ намояндагӣ мекунанд.
Дар консерт ба ҷуз сарони кишварҳо, аъзои ҳайати расмии Ӯзбекистон, аъзои ҳукумат ва парлумони Тоҷикистон, намояндагони корпусҳои дипломатии муқими Душанба ва аҳли ҷомеа низ иштирок мекунанд.
Ёдрас мекунем, ки зимни нахустин сафари президенти якуми Ӯзбекистон Ислом Каримов ба Душанбе моҳи июни соли 2000 дар толори маҷмааи «Кохи Борбад» консерти муштараки устодони санъати ҳарду кишвар баргузор шуда буд.
Он замон президенти Тоҷикистон Эмомалӣ Раҳмон ба ду сарояндаи маъруфи Ӯзбекистон Фаррух Зокиров ва Мардон Мавлонов унвонҳои фахрии «Ҳунарманди халқии Тоҷикистон»-ро тақдим карда буд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
