Сафари ҳайати Ҷумҳурии Халқӣ-Демократии Корея таҳти сарварии вазири корҳои хориҷии ин кишвар Ли Ён Хо рӯзҳои 13-15 апрел дар назар аст.
Дар ҷараёни сафар Ли Ён Хо бо вазири корҳои хориҷии Тоҷикистон Сироҷиддин Аслов дидору гуфтушунид карда, дар мулоқот масъалаҳои ҳамкориҳои тиҷоративу иқтисодӣ, иҷтимоиву гуманитарӣ, ҳамчунин масоили марбут ба амният дар ҷаҳон баррасӣ мешаванд, хабар медиҳад департаменти иттилооти Вазорати корҳои хориҷии Тоҷикистон.
Ёдрас мекунем, ки моҳи сентябри соли гузашта Вазорати корҳои хориҷии Тоҷикистон изҳор намуд, ки дар мавриди нигарониҳои ҷомеаи ҷаҳонӣ дар робита ба озмоиши навбатии силоҳи ҳастаӣ дар Ҷумҳурии Халқӣ-Демократии Корея ҳамақида мебошад.
«Ин гуна иқдомҳои таҳрикомези Пхенян таҳдидҳои ҷиддӣ ба амнияти ҷаҳонӣ ва минтақавӣ эҷод менамояд», – қайд шуда буд он замон дар сомонаи Вазорати корҳои хориҷии Тоҷикистон.
Зикр гардида буд, ки дар ин замина, Тоҷикистон аз талошҳо барои ҳаллу фасли қазияи ҳастаӣ дар нимҷазираи Корея аз тариқи абзорҳои сиёсию дипломатӣ ҷонибдорӣ мекунад ва даъват ба амал меорад, ки Ҷумҳурии Халқӣ-Демократии Корея меъёрҳои дахлдори ҳуқуқи байналмилалӣ ва қатъномаҳои Шӯрои амнияти СММ-ро ба таври ҳатмӣ иҷро намояд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
