Гурӯҳи аввалини шаҳрвандони Тоҷикистон, ки дар макони муқаддаси ислом маросими ҳаҷро адо карданд, рӯзи 31 август ба ватан бармегарданд.
Тавре ба «Азия-Плюс» як манбаъ аз Кумитаи дин, танзими анъана ва ҷашну маросими миллии ҷумҳурӣ хабар дод, то 14 сентябр ҳамаи зойирини тоҷик ба ватан бармегарданд.
Намояндагони Кумита дар Маккаву Мадина бо онҳо суҳбат ороста, меъёрҳои қонун «Дар бораи танзими анъана ва ҷашну маросим»-ро, ки мувофиқи он гуселу пешвози ҳоҷиён дар доираи оила гузаронида мешавад, бори дигар шарҳ доданд.
«Қонун ташкили маросимҳое чун «ҳоҷиталбон» ва «ҳоҷиошӣ»-ро манъ мекунад. Тақсими оби зам-зам ва хурмои хушкшуда мумкин аст. Сокинон ҳоҷиро бо адои маросими ҳаҷ табрик карда метавонанд», – гуфт манбаъ.
Соли 2014 ҳукуматдорони Тоҷикистон ду ҳоҷиро барои аз ҷониби пайвандону наздиконаш дар фурудгоҳ ташкил кардани пешвози пуршукӯҳ ва овардани лимузин ҷаримаи калон бастанд.
Қобили зикр аст, ки имсол наздики 6 ҳазор нафар тоҷикистониён ба зиёрати макони муқаддаси Ислом шарафёб гардиданд. Арзиши адоои маросими ҳаҷ барои шаҳрвандони Тоҷикистон 33 ҳазору 410 сомониро ташкил дод.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
