Рӯзи 27 август комиссияи интихобии Ҷоизаи ҳуқуқи инсон ба номи Васлав Ҳавел дар ҷаласааш дар Прага таҳти раёсати Президенти Ассамблеяи Парлумонии Шӯрои Аврупо (ПАСЕ) Лилиан Маури Паскуа исми се номзади асосӣ ба ин ҷоиза дар соли 2019-ро эълон кард.
Бино ба иттилои сомонаи расонаи мустақили “Ахбор”, ба шорт-лист ҳомии ҳуқуқи уйғурҳо Илҳом Тоҳтӣ, адвокати тоҷик Бузургмеҳр Ёров ва созмони «Ташаббуси ҷавонон барои ҳуқуқи инсон» («Youth Initiative for Human Rights») шомил карда шуданд.
Комиссияи интихобӣ исми барандаи ҷоизаро рӯзи 29 сентябр дар Страссбург маълум мекунад ва номи баранда рӯзи 30 сентябр дар иҷлосияи Маҷмаи парлумонии Шӯрои Аврупо дар Страссбург эълон хоҳад шуд.
Гуфта мешавад, Бузургмеҳр Ёров нахустин намояндаи Тоҷикистон аст, ки барои дарёфти Ҷоизаи ба номи Васлав Ҳавел пешбарӣ шудааст.
Сиёсатмадори тоҷик, доктори илмҳои ҳуқуқшиносӣ Шокирҷон Ҳакимов бар ин назар аст, ки пешбарии номзадии Ёров ба дарёфти Ҷоизаи Ҳавел қобили таваҷҷуҳу дастгирӣ мебошад.
Дар мусоҳиба ба “Азия-Плюс” ӯ изҳор намуд, ки Ёров ҳамчун адвокат ба шахсони муроҷиаткарда ба ӯ чун ба камбизоатону сарватмандон фарқ нагузошта, ба ақидаҳои сиёсии онҳо таваҷҷуҳе надошт.
“Ёров ҳамеша кӯшиш мекард, ки адвокатура дар низоми судии Тоҷикистон мавқеи арзанда дошта бошад”, – илова намуд Ҳакимов.
Ҷоизаи ҳуқуқи инсон ба номи Васлав Ҳавел ҳамасола моҳи октябр дар Страсбург ва минбаъд бо маросими қадрдонӣ дар Прага доир мегардад. Он ба ҳомии ҳуқуқ ё ташкилоти ҷамъиятӣ барои саҳми арзанда дар соҳаи пешбурди ҳифзи ҳуқуқи инсон тақдим гардида, Ҷоизаи ҳуқуқи башарро, ки Ассамблеяи парлумонии Шӯрои Аврупо соли 2007 таъсис дода буд, иваз мекунад. Ҷоизаи Ҳавел дар маросими ифтитоҳи иҷлосияи тирамоҳии Ассамблеяи парлумонии Шӯрои Аврупо супурда мешавад. Ба ҷоизадор диплом ва мукофотпулӣ дар ҳаҷми 60 евро тақдим гардида, воситаҳо аз ҷониби ҳукумати Чехия ҷудо карда мешавад.
Ёдрас мекунем, ки Бузургмеҳр Ёров айни замон дар зиндон қарор дорад. Ҳабси ӯ дар пайи оғози ҳимояташ аз аъзои Ҳизби фаъолияташ дар Тоҷикистон манъшудаи наҳзати исломӣ, ки он замон мавриди тафтиш қарор доштанд, сурат гирифт.
Ба иттиҳоми қаллобӣ, сохтакории ҳуҷҷатҳо, даъватҳои оммавӣ ба фаъолияти ифротгароӣ, беҳурматӣ нисбати суд ва таҳқири президенти Тоҷикистон ӯ ба 28 соли зиндон маҳкум шуд. Моҳи декабри соли 2017 ӯ ба муассисаи ислоҳии низомаш сахти рақами яки шаҳри Душанбе гузаронида шуд.
Маводи мо бо суроғаҳои news.tj ё asiaplus.news тариқи браузери Opera (ба кор даровардани VPN лозим аст) қобили дарёфт аст. Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
