Раиси Маҷлиси миллии Маҷлиси Олии Тоҷикистон Рустами Эмомалӣ имрӯз, 20 июл дар бораи даъвати иҷлосияи муштараки ҳар ду палатаи парлумони чумҳурӣ қарор имзо кард. Он рӯзи 6 август баргузор мешавад.
Тавре ба “Азия-Плюс” аз парлумони кишвар хабар доданд, аъзои Маҷлиси миллӣ ва вакилони Маҷлиси намояндагони Маҷлиси ОлииТоҷикистон дар ин иҷлосия рӯзи интихоботи президентиро эълон мекунанд.
Ба гуфтаи манбаъ, “ба гумони ғолиб, маъракаи интихоботи президенти Тоҷикистон ба рӯзи 6 ноябри соли равон таъин мешавад”.
Ёдрас мекунем, ки муҳлати ваколатҳои президенти амалкунандаи Тоҷикистон Эмомалӣ Раҳмон рӯзи 6 ноябри соли 2020 ба анҷом мерасад.
Мувофиқи меъёрҳои қонунгузории кишвар, рӯзи интихоботи президенти Тоҷикистон дар иҷлосияи муштараки ҳар ду палатаи парлумони ҷумҳурӣ, на дертар аз ду моҳ пеш аз анҷоми муҳлати ваколатҳои президенти амалкунанда таъин мешавад.
Тибқи меъёрҳои Конститутсия, Президентро шаҳрвандони Тоҷикистон ба тарзи умумӣ, мустақим, баробар ва овоздиҳии пинҳонӣ ба муҳлати 7 сол интихоб менамоянд.
Шахсе ба номзадии Президенти Тоҷикистон пешниҳод шуда метавонад, ки танҳо шаҳрвандии Тоҷикистонро дошта бошад, синни ӯ аз 30 кам набуда, дорои таҳсилоти олӣ бошад, забони давлатиро донад ва дар ҳудуди ҷумҳурӣ на камтар аз 10 соли охир истиқомат дошта бошад.
Шахсе ба номзадии Президент ба қайд гирифта мешавад, ки ҳадди ақал 5 фоизи интихобкунандагон ба пешниҳоди номзадии ӯ имзо гузошта бошанд.
Як шахс ба вазифаи Президент бештар аз ду муҳлат пай дар пай интихоб шуда наметавонад. Ин маҳдудиятҳо ба Асосгузори сулҳу ваҳдати миллӣ – Пешвои миллат Эмомалӣ Раҳмон дахл надоранд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
