Сафорати Амрико дар Тоҷикистон бо пахши як эъломия гуфтааст, шаҳрвандони Русия, Ӯзбекистон, Афғонистон ва Эрон метавонанд дар Душанбе виза ё раводиди ғайримуҳоҷиратӣ гиранд.
Ин ниҳоди дипломатӣ, имрӯз, 1-уми ноябр, афзуд, сафорати ИМА дар Душанбе гуфт, аз якуми ноябр шаҳрвандони Русияву Афғонистон ва Эрон ҳақ доранд, барои дастрас кардани визаи ғайримуҳоҷиратӣ (на визаи корӣ) дар рӯзҳои мушаххас муроҷиат кунанд.
Ин ба он маъност, ки онҳо барои саёҳат, дидорбинӣ ва ё табобат дар Амрико ҳақ доранд аз Душанбе виза пурсанд.
“Сафорат шумораи ҷойҳоро барои гузаштани мусоҳибаи раводидӣ зиёд мекунад ва акнун афроди ғайримуқими Тоҷикистон метавонанд барои мусоҳиба худро номнавис кунанд. Аз рӯзи сешанбе, санаи 1-уми ноябр, соати 8:30, Сафорат ҷойҳои мусоҳибавиро барои моҳҳои декабр, январ ва феврал хоҳад кушод”, – омадааст дар изҳороти Сафорати ИМА.
Масъулини ин ниҳоди дипломатӣ гуфтаанд, афроди ғайримуқими Тоҷикистон танҳо санаҳои 16, 30-юми декабр, 13, 20-уми январ, 10, 17-уми феврал барои мусоҳиба номнавис кунанд. Ба таъкиди онҳо, мусоҳибаҳое, ки берун аз санаҳои муайяншуда интихоб мешаванд, лағв хоҳанд шуд.
“Сокинони Тоҷикистон набояд дар санаҳое, ки барои афроди ғайримуқими Тоҷикистон муайян шудаанд, номнависӣ кунанд. Мусоҳибаҳое, ки дар он рӯзҳо интихоб шуданд, лағв хоҳанд шуд”, – омадааст дар изҳороти ин ниҳоди дипломатӣ.
Ёдовар мешавем, ки шурӯъ, аз 4-уми октябри соли 2022 Сафорати ИМА дар Душанбе ба расмият даровардани раводидҳои муҳоҷиратии ИМА-ро барои шаҳрвандон ва сокинони Тоҷикистон оғоз карда буд. То октябри соли ҷорӣ раводидҳои муҳоҷиратии ИМА барои шаҳрвандон ва сокинони Тоҷикистон дар Консулгарии генералии ИМА дар Алматои Қазоқистон ба расмият дароварда мешуданд.
