Ҳукумати Ӯзбекистон 7-уми ноябр лоиҳаи қарореро ба баррасии умум пешниҳод кард, ки пардохти кумакпулӣ ба намояндагони соҳаи фарҳанг ва санъат, аз ҷумла ҷавонони эҷодкорро ҳангоми хариди манзил ё сохтмони хона пешбинӣ мекунад. Дар ин бора centralasian.org хабар медиҳад.
Тибқи лоиҳа, ба намояндагони бахши фарҳангу ҳунари Ӯзбекистон ҳангоми харидани хона тариқи ипотека 50 дарсади арзиши маблағ аз ҳисоби даромадҳои иловагии буҷаи давлат кумак карда хоҳад шуд.
Ҳаҷми ин кумаки молӣ барои сокинони Қарақалпоқистон то 192,5 миллион сӯм (ҳудуди 15,7 ҳазор доллар) ва барои сокинони шаҳру вилояти Тошканд то 245 миллион сӯм (тақрибан 20 ҳазор доллар) муайян шудааст.
Ин лоиҳа, ки дар сомонаи санадҳои меъёриву ҳуқуқии Ӯзбекистон нашр шудааст, баҳсҳоеро дар миёни корбарони шабакаҳои иҷтимоӣ ба бор овардааст. Корбарон гуфтаанд, ҳукумат ба ҷои кумак ба намояндагони илму маориф, ки шароити “он қадар хуб надоранд”, мехоҳад, ба сарояндаҳои “доро” ёрӣ расонад.
