Дар нишасти Созмони ҳамкории Шанхай (СҲШ) дар шаҳри Остонаи Қазоқистон санадҳо дар бораи ба узвияти Созмон пазируфтани Беларус ба имзо расид.
“Кишвари шумо дар як муддати кӯтоҳ ҳамаи расмиёти заруриро ҷиҳати узви комилҳуқуқ шудан иҷро кард”, – гуфт президенти Қазоқистон Қосим-Жомарт Токаев ба сарвари давлати Беларус Александр Лукашенко.
Ба ин тариқ, шумори аъзои СҲШ то 10 давлат расид: Беларус, Тоҷикистон, Қазоқистон, Қирғизистон, Ӯзбекистон, Русия, Ҳиндустон, Чин, Покистон ва Эрон. Боз ду кишвар мақоми нозири созмонро доранд: Афғонистон ва Муғулистон.
Созмони ҳамкории Шанхай соли 2001 таъсис дода шуда, ҳадафаш таҳкими эътимоди мутақобила, ҳамкорӣ баҳри рушди иқтисод ва муқовимат ба таҳдиду чолишҳо унвон шудааст. Дар созмон таъкид мекунанд, ки он аломатҳои эътилофи ҳарбӣ надорад. Забонҳои расмиаш русӣ ва чинӣ мебошад.
Нишасти дурӯзаи СҲШ дар Остона имрӯз, 4 июл ба анҷом мерасад. Президенти Қазоқистон Қосим-Жомарт Токаев қаблан изҳор дошт, ки иштирокчиёни нишасти Остона ба ҷомеаи ҷаҳонӣ бо даъвати оғоз намудани муколамаи ошкоро ва содиқонаи глобалӣ, қабули сохт (парадигма)-и нави амниятӣ, эҷоди муҳити одилонаи иқтисодӣ ва талошҳо барои ҳифзи тозагии сайёра муроҷиат хоҳанд кард.
Дар мақолаи раиси Чин дар “Казинформ” Си Ҷинпин изҳор доштааст, ки нишасти Остона «оилаи бузурги кишварҳои узви иттиҳодро муттаҳид намуда, саҳифаи навро дар ҳамкорӣ боз хоҳад кард».
Ёвари президенти Русия оид ба корҳои байнулмилалӣ Юрий Ушаков эълон кард, ки сарварони давлатҳои СҲШ 24 санад имзо хоҳанд кард, аз ҷумла қарор дар бораи тасдиқи ташаббус «Дар бораи ваҳдати ҷаҳонӣ барои ҷаҳони одилона ва ризоият», ки ба «тасдиқи садоқат ба ташаккули тартиботи ҷаҳонии бештар сернамоянда, демократӣ, одилона ва бисёрқутбӣ бо нақши асосии ҳамоҳангсози СММ» равона шудааст. Ҳамчунин, интизор меравад, ки сарварони давлатҳо Изҳорот дар бораи принсипҳои ҳамсоягии нек, эътимод ва шарикӣ қабул кунанд.
