Дар рӯзи дуюми мусобиқоти қаҳрамонии ҷудои ҷаҳон миёни ҷавонон, ки дар Душанбе ҷараён дорад, варзишгарони тоҷик як медал ба даст оварданд.
Ҷудокори ҷавони тоҷик Муҳиддин Асадуллоев дар вазни 73 кг бо шикаст додани рақибонаш аз Русия, Лаҳистон ва Италия ба даври нимниҳоӣ роҳ ёфт. Вале дар ин марҳила аз рақиби ҷопониаш Юсуке Такеичи шикаст хӯрд ва ба финал роҳ наёфт.
Аммо дар мубориза барои медали биринҷӣ бар муқобили Абубакр Юсупов, намояндаи Русия пирӯзӣ ба даст овард ва медалро ба гардан овехт.
Бояд гуфт, ки дар рӯзи аввали мусобиқоти қаҳрамонии ҷаҳон байни ҷавонон дар риштаи ҷудо Тоҷикистон як медали нуқра ба даст оварда буд.
Ин медалро Лоиқ Қутбуддинов, паҳлавони ҷавони тоҷик дар вазни то 60 кг соҳиб шуд.
Ӯ пас аз шикаст додани рақибонаш аз Туркманистон, Мексика, Муғулистон, Қазоқистон ва Ӯзбекистон ба марҳилаи ниҳоӣ баромад. Аммо дар финал аз Ямато Фукудаи ҷопонӣ шикаст хӯрд ва медали тиллоро аз даст дод.
Ёдрас мешавем, ки мусобиқоти мазкур, ки 2-юми октябр шурӯъ шуд, то 6-уми ҳамин моҳ давом меёбад.
Гуфта мешавад, ки 531 варзишгар аз 67 кишвари дунё дар ин мусобиқа иштирок доранд.
Тоҷикистонро дар мусобқоти қаҳрамонии ҷудои ҷаҳон байни ҷавонон 24 варзишгар (17 писару 7 духтар) намояндагӣ мекунанд.
Бо гузашти ду рӯзи аввали мусобиқа Ҷопон бо касби 5 медали тилло, 4 нишони нуқра ва як биринҷӣ миёни мунтахабҳо дар ҷойи аввал меистад.
Варзишгарони Чин бо ба даст овардани як медали тилло ва як нуқра дар ҷойи дуюм қарор дорандд. Зинаи сеюмро мунтахаби Фаронса бо як медали тилло аз они худ кардааст. Тоҷикистон бо як медали нуқра, як нишони биринҷӣ ва як ҷойи ҳафтум дар зинаи панҷум қарор дорад.
Ғолибони ҷойи якум дар ин мусобиқа 2500 евро, ҷойҳои дуюм 1500 евро ва зинаҳои сеюм 850 евро ба даст меоранд.
