Маросими қуръакашии даври асосии мусобиқоти Ҷоми футболи Тоҷикистон-2026 баргузор шуд. Аз рӯи натиҷаҳои он 16 даста аз ҳарифони худ дар даври 1/8 финалии мусобиқа, ки дар он ба рақобат тимҳои лигаи олӣ ҳамроҳ мешаванд, огоҳ шуданд.
Дар мусобиқоти кунунӣ 12 дастаи лигаи олӣ ва 4 намояндаи лигаи якум, ки марҳилаҳои интихобиро муваффақона гузаштанд, иштирок мекунанд. Маҳз аз ҳамин марҳила мусобиқа шакли пурраи плей-оффро мегирад, яъне дастаи мағлубшуда аз рӯи натиҷаҳои ду вохӯрӣ аз ҳаққи идомаи мусобиқа маҳрум мешавад.
Тибқи натиҷаҳои қуръакашӣ ҷуфтҳои зерини давраи 1/8 финалии мусобиқаи Ҷоми футболи Тоҷикистон-2026 маълум шуданд: «Регар-ТадАЗ» — «Эсхата», КМВА (ЦСКА) — «Панҷшер», «Сардор» — «Рахш», «Истаравшан» — «Барқчӣ», «Равшан» — «Ҳосилот», «Парвоз» — Ғолиби бозии ҷуфти «Душанбе»/«Сомон», «Вахш» — «Моҳир», «Хуҷанд» — «Истиқлол».
Қобили зикр аст, ки дар ин мусобиқа имсол аз даври 1/8 финалӣ баргузории ду бозии дастаҳо – дар хона ва дар меҳмонӣ пешбинӣ шудааст. Бозиҳои аввали даври 1/8 финалӣ рӯзҳои 27-29 май муқаррар шудааст. Бозии финалии Ҷоми футболи Тоҷикистон-2026 дар варзишгоҳи “Вахш” дар Бохтар доир мегардад.
Айни замон тими “Регар-ТадАЗ” аз шаҳри Турсунзода соҳиби Ҷоми футболи Тоҷикистон аст. Дар бозии финалии соли гузашта футболбозони шаҳри Турсунзода дастаи “Эсхата” аз Хуҷандро бо ҳисоби калони 5:0 мағлуб карда буданд.
