Расонаҳои амрикоӣ ному насаби нафареро, ки дирӯз, 1-уми январ, дар шаҳри Ню-Орлеан бо мошин одамонро пахш карда, боиси марги 10 нафар ва захмӣ шудани 30 нафар шуд, эълон карданд. CBS News бо такя ба ду манбаъ дар мақомоти федеролии Амрико навишт, ҳамлавар Шамсуддин Ҷаббор ном дорад. Ин мард бо оташи ҷавобии пулис кушта шудааст.
Шамсуддин Ҷаббор шаҳрвандии ИМА-ро доштааст ва қаблан дар артиши ин кишвар хидмат намудааст. Аммо асли табори ӯ аз кадом давлат аст номаълум боқӣ мемонад.
Субҳи 1-уми январ дар пайи бархӯрдани як мошини борбар ба издиҳоми одамон ба иттилои расонаҳои гуногуни амрикоӣ, аз 10 то 15 кас кушта ва беш аз 30 нафар захмӣ шуданд. Сабабу ангезаи ҷиноят маълум нест. Ҳодиса дар ҷануби аёлати Луизиана иттифоқ уфтод. Замоне ки мардум фаро расидани соли нави 2025-ро таҷлил мекарданд.
Баъзе аз шоҳидон гуфтаанд, ронанда ҳамчунин ба сӯйи одамон тир холӣ кард. Нерӯҳои пулис оташи ҷавобӣ кушодаанд.
Ҳокими Луизиана ҳодисаро “амали даҳшатбор” ва шаҳрдори Ню – Орлеан “амали террористӣ” номиданд. Мақомот гуфтанд, ки ҳодисаро таҳқиқ доранд.
