Дар машқгоҳи “Ҳарб-Майдон” дар вилояти Хатлон тамринҳои муштараки зиддитеррористии Қувваҳои мусаллаҳи Тоҷикистон ва Русия оғоз гардида, марҳилаи фаъоли он аз 7 то 11 апрел баргузор мешавад. Дар ин бора Вазорати мудофиаи Русия хабар медиҳад.
Дар ҷараёни тамринҳо воҳидҳои ҳарбии ду кишвар ташкили амалҳои муштаракро оид ба маҳви гурӯҳҳои террористӣ, омодагии воҳидҳо ба иҷрои вазифаҳои гузошташуда дар шароити мавзеи кӯҳсор машқу тамрин мекунанд.
“Марҳилаи асосии машқҳо роҳандозии амалиёти муштарак оид ба нобуд сохтани гурӯҳҳои ғайриқонунии мусаллаҳ, инчнуин идоракунии воҳидҳо дар ҷараёни ҳифзи сарҳад ва маҳви гурӯҳҳои марзро убуркарда хоҳад буд”, – зикр мешавад дар хабар.
Асоси воҳидҳои Русияро қисмҳои пойгоҳи 201-уми ҳарбии Ҳавзаи ҳарбии марказӣ, аз ҷумла воҳидҳои тирандоз, гурӯҳи сарнишинони авиатсионӣ дар чархболҳои зарбазани Ми-24 ва нақлиёти ҷангии Ми-8МТВ5-1 ташкил медиҳанд.
Ҳамчунин дар тамринҳо мутахассисони алоқа, операторони FPV-дронҳо ва дастгоҳҳои иктишофии бесарнишини, инчунин гурӯҳҳои зудамали муқовимати радиоэлектронӣ низ иштирок мекунанд.
Пойгоҳи низомии 201-уми Русия дар Тоҷикистон бузургтарин иншооти ҳарбии Русия дар берун аз ҳудуди он буда, дар ду шаҳри ҷумҳурӣ – Душанбе ва Хатлон мустақар аст. Ба ҳайати он воҳидҳои тирандози сайёр, артиллерӣ, иктишофӣ, инчунин қисмҳои мудофиаи ҳавоӣ, ҳифзи радиатсионӣ ва кимиёвӣ ва алоқа шомиланд.
Машқгоҳи “Ҳарб-Майдон” дар мавзеи кӯҳистону биёбон тқрибан 20 километр дуртар за сарҳади байни Тоҷикистону Афғонистон воқеъ аст.
