Соли 2025 дар Тоҷикистон зиёда аз 2,8 млн тонна ангишт истихроҷ шуд, ки 235 ҳазор тонна ё худ 10% зиёдтар нисбат ба соли 2024 аст. Истихроҷ аз ҷониби 20 корхона дар 15 кон сурат гирифтааст. Дар ин бора зимни нишасти матбуотӣ дар Душанбе вазири саноат ва технологияҳои нави ҷумҳурӣ Шералӣ Кабир хабар дод.
Содироти ангишт афзуд: аз Тоҷикистон ба хориҷа 558,7 ҳазор тонна ангишт интиқол ёфт, ки 42% бештар дар муқоиса бо соли 2024 мебошад. Харидори асосӣ Ӯзбекистон шуд, ки 558,2 ҳазор тонна ё худ 99,91% аз ҳаҷми умумиро харидорӣ намуд. Ба Афғонистон ҳамагӣ 474 ҳазор тонна ангишт фиристода шуд.
Содиркунандагони бузурги ангишт аз Тоҷикистон ҶДММ “Комбинати металлургии тоҷик” бо ҳаҷми интиқоли зиёда аз 363 ҳазор тонна ва ҶДММ “Қудрат” бо ҳаҷми интиқоли 131 ҳазор тонна маҳсуб меёбанд. Аз содироти ангишт Тоҷикистон ҳудуди 6,5 млн доллар даромад ба даст овард.
Дар дохили Тоҷикистон 2,27 млн тонна ангишт фурӯхта шудааст, 800 ҳазор тонна аз ин миқдор ба Маркази барқу гармидиҳии Душанбе-2 рост меояд. Ҳудуди 451 ҳазор тонна ангиштро аҳолӣ харидааст.
Тавре ки дар Вазорати саноат зикр карданд, солҳои наздик дар конҳои “Фон-Яғноб” ва “Назар-Айлоқ” сохтмони корхонаҳои нави истихроҷи ангишт ба нақша гирифта шудааст. Дар мавриди ҷалби сармоя ва рушди иқтидорҳои истеҳсолӣ дар соҳаи истихроҷи ангишт, бо ширкатҳо аз Русия, Чин, кишварҳои узви Иттиҳоди Аврупо ва Ӯзбекистон ҳамкориҳо ба роҳ монда шудааст.
