То имрӯз дар Тоҷикистон беш аз 20 пизишки халқӣ ба табобат машғул буда, ҳамаи онҳо иҷозатномаи фаъолият доранд ва дар қайди вазорат ҳастанд. Дар ин бора Ҷамолиддин Абдуллозода, вазири тандурустӣ ва ҳифзи иҷтимоии аҳолӣ хабар дода гуфт, "дар Тоҷикистон ягон кас ҳуқуқ надорад, ки худсарона ҳамчун табиби халқӣ ба табобат машғул шавад ё чунин марказ боз кунад".
Вазир рӯзи 28-уми январи имсол дар нишасти матбуотӣ гуфт, дар кишвар “Маркази ҷумҳуриявии тибби халқӣ” амал мекунад ва табибон дар ин муассиса такмили ихтисос гирифта, баъди ба даст овардани иҷозатнома ҳаққи фаъолият ба даст меоранд.
Ба гуфтаи Ҷамолиддин Абдуллозода, маҳсдармонӣ, сӯзандармонӣ, истифодаи гиёҳҳои шифобахш, шулукдармонӣ, аз ҷумлаи навъҳои табобати мардумӣ буда, табибони халқӣ дар Тоҷикистон бо ин навъҳо иҷозаи дармон доранд.
Ба қавли вазир, сохторҳои дахлдор ҳолатҳои худсарона машғул шудан ба табобати мардумиро санҷида, дар сурати ошкор гардидани чунин табибон, фаъолияти онҳоро қатъ мекунанд.
Аммо вазир нагуфт, ки то имрӯз чунин ҳолатҳо вуҷуд доштанд ва оё мақомоти назоратӣ ин гуна шахсон ва ё марказҳоро ошкор кардаанд ё не.
Ин дар ҳолест, ки мақомоти кишвар солҳои охир аз боздошти чанд муллову ҷинбарор ва ё фолбин, ки зери номи “табиби мардумӣ” ба фаъолият машғул буданд, хабар медиҳад.
Аксаран дар Тоҷикистон онҳое, ки ба фолбиниву сеҳру ҷоду ва эмкунӣ машғуланд, худро "табибони халқӣ" муаррифӣ мекунанд.
Чанд рӯз қабл Рамазон Раҳимзода, вазири корҳои дохилии кишвар низ дар нишасти матбуотӣ гуфт, беш аз 5 ҳазор нафар, ки дар кишвар ба сеҳру ҷоду ва фолбинӣ машғул будаанд, ба қайд гирифта шудаанд. Аммо нагуфт, ки чанд нафари онҳо ба ҷавобгарӣ кашида шуда, чӣ ҷазо гирифтанд.
Табибоне, ки аз кишварҳои дигар вориди Тоҷикистон мешаванд
Ҷамолиддин Абдуллозода, вазири тандурустӣ ҳамчунин дар робита ба табибоне, ки аз кишварҳои дигар вориди ҷумҳурӣ мешаванд, гуфт, “онҳо бе сертификат (гувоҳинома)-и Вазорати тандурустӣ ва бе шаҳодатномаи Хадамоти фаъолияти тиббӣ-фармасевтӣ ҳуқуқи фаъолият дар қаламрави кишварро надоранд".
Бояд гуфт, ахиран, Иқбол Солиев, ном табибе аз Ӯзбекистон, ки аз Тоҷикистон низ муштариён дошт ва гӯё беморонро бо ламсу молиш “табобат” мекард, барои бе иҷозатнома ба фаъолияти тиббӣ машғул шудан ҳабс шуд. Ӯ чанд моҳ пеш ба Тоҷикистон ҳам омада буд.
