Вазорати рушди иқтисод ва савдои Тоҷикистон дар ҳамкорӣ бо Созмони Милали Муттаҳид оид ба рушди саноат (ЮНИДО) раванди татбиқи лоиҳаи нави “Гузариши минтақаҳои озоди иқтисодӣ ба низоми рақамӣ”-ро муаррифӣ кард.
Дар вохӯрие, ки рӯзи 14-уми апрел бо иштироки намояндагони вазорат, ҳамоҳангсозони байналмилалӣ ва рӯзноманигорон дар Душанбе баргузор гардид, гуфта шуд, ки ҳадафи ин лоиҳа таъсиси пойгоҳи ягонаи иттилоотӣ аст, ки ҳамчун “Равзанаи ягона” барои сармоягузорони дохилию хориҷӣ хидмат хоҳад кард.
Дар ҷараёни муаррифии лоиҳа, Сарвиноз Ҷунайдова, ҳамоҳангсози миллии лоиҳаи ЮНИДО дар Тоҷикистон, иброз дошт, ки ин иқдом барои соддагардонии расмиёти маъмурӣ ва баланд бардоштани шаффофияти фаъолият дар минтақаҳои озоди иқтисодии (МОИ) кишвар заминаи мусоид фароҳам меорад.
“Тавассути “Равзанаи ягона” соҳибкорон имкон пайдо мекунанд, ки дархостҳои худро ба таври онлайн пешниҳод карда, бе сарсонии зиёд иҷозатномаи фаъолият ва дигар имтиёзҳои пешбинишударо ба даст оранд”, – гуфт ӯ.
Ҷунайдова таъкид кард, ки рақамикунонии минтақаҳо ба ҳукумати кишвар кӯмак мекунад, то ба сатҳи нави рушди технологӣ бароянд.
Манучеҳра Мадҷон, сардори Сарраёсати рушди минтақавӣ ва сиёсати сармоягузории Вазорати рушди иқтисод ва савдо, зикр кард, ки ҷалби сармоя ва муаррифии иқтидори саноатии минтақаҳо бе истифодаи воситаҳои муосири ахбор имконнопазир аст.
Ӯ гуфт, дар ин робита, вазорат ният дорад ҳамкориро бо ВАО тақвият бахшида, дар ояндаи наздик хабарнигорро ба минтақаҳои озоди иқтисодии вилоятҳои Хатлону Суғд барад.
Ба гуфтаи ӯ, интизор меравад, ки гузариш ба низоми “Равзанаи ягона” ва дигаргунсозии рақамии МОИ ба ҷалби бештари фанновариҳои нав ба иқтисодиёти Тоҷикистон мусоидат хоҳад кард.
Дар Тоҷикистон чанд Минтақаҳои озоди иқтисодӣ аст, кадоме воқеан кор мекунанд ва кадоме танҳо дар коғаз “фаъолият доранд”? Дар ин матлаби мо хонед.
