Душанбе. 26-уми март. ОИ «Азия-Плюс» – Тибқи гузориши Маркази иттилооти СММ, Қарордоди минтақаи озод аз силоҳи ҳастаӣ дар Осиёи Марказӣ аз 21-уми март мавриди амал қарор гирифт.

Ёдовар мешавем, зери созишномаи шаҳри Семипалатинск аз 8-уми сентябри соли 2006 кишврҳои Қазоқистон, Қирғизистон, Тоҷикистон, Туркманистон ва Ӯзбекистон имзо гузошта буданд. Кишварҳои узви созишнома ӯҳдадор шуданд, ки истеҳсол, харидорӣ ва ҷой додани силоҳи ҳастаӣ, ҷузъиёти он ва дигар таҷҳизоти таркандаи ҳастаиро дар қаламрави кишварашон манъ созанд. Дар ҳамин ҳол, тибқи қарордод, роҳандозхии фаъолият оид ба рушди энергетикаи ҳастаии сулҳомез манъ карда нашудааст.

Чунин минтақаҳои озод аз силоҳи ҳастаӣ дар Амрикои Лотинӣ, Африқо, минтақаи Уқёнуси Ором ва Осиёи Ҷанубу Шарқӣ таъсис дода шуда, беш аз 100 кишвари дунёро муттаҳид месозанд.

Душанбе. 25-уми март. ОИ «Азия-Плюс» – Нахустин ширкати ҳавопаймоии тиҷоратии Тоҷикистон – «Somon air» боз як тайёраи навъи «Boeing 737-800» харидорӣ кард.

Чӣ тавре ки мудири кулли ширкат Музаффар Исҳоқов ба ОИ «Азия-Плюс» хабар дод, тайёра дар ИМА тариқи қарзи бонкӣ харидорӣ шудааст. Ӯ аз пешниҳоди маълумоти муфассал оид ба арзиши тайёра худдорӣ намуд. Танҳо ҳаминаш маълум аст, ки ҳавопаймо ба исми асосгузори адабиёти шӯравии тоҷик Садриддин Айнӣ номгузорӣ гардидааст.

Тибқи маълумоти расида аз ширкати мазкур, тайёраи мусофирбар аз Туркия ба фурудгоҳи Душанбе оварда шуда, барои 172 нафар мусофир пешбинӣ гардидааст ва ба хатсайрҳои кишварҳои хориҷи дур, аз ҷумла шаҳрҳои Франкфурт ва Урумчӣ парвозҳо анҷом хоҳад дод. «Тайёраи нахустини навъи «Boeing 737-800»-и ширкат дар як ҳафта ҳамарӯза ба шаҳри Маскав ва як маротиба ба шаҳри Дубай (Аморати Муттаҳидаи Араб) парвоз анҷом медиҳад», – гуфт манбаъ.

Бино ба иттилои манбаъ, минбаъд роҳандозии парвози тайёраҳо ба шаҳрҳои Истанбул, Деҳлӣ, Теҳрон, Бангкок ва шаҳрҳои дигари ҷаҳон ба нақша гирифта шудааст.

           

Душанбе. 25-уми март. ОИ «Азия-Плюс» – Пагоҳ дар шаҳрҳои Душанбе ва Ваҳдат ба муносибати Рӯзи байнулмилалии мубориза бо бемории сил Ҷамъияти Ҳилоли Аҳмари Тоҷикистон автомарафон барпо мекунад.

Намояндаи ҶҲАТ Сайидо Назаров ба ОИ «Азия-Плюс» гуфт, чорабинии мазкур бо дастгирии молиявии Комиссияи Аврупо, созмонҳои Салиби Сурхи Нидерланд, Федератсияи байнулмилалии Ҷамъияти Ҳилоли Аҳмар ва Салиби Сурх баргузор мегардад.

Ба қавли С.Назаров, ҶҲАТ назди худ мақсад гузоштааст, ки тариқи баргузории ин чорабинӣ тарзи ҳаёти солимро таблиғ намуда, ба аҳолӣ оид ба пешгирӣ ва мубориза бо бемориии сил маълумоти зарурӣ пешниҳод созад. «Дар баргузории чорабинӣ ба муҳоҷирони меҳнатӣ таваҷҷӯҳи хос зоҳир хоҳад гардид, зеро маҳз онҳо доир ба бемории сил ва роҳҳои пешгириву табобати он бояд маълумоти зарурӣ дошта бошанд», – гуфт ӯ.

С.Назаров афзуд, зимни баргузории чорабинӣ фарогирии беш аз 2500 нафар аҳолии шаҳрҳои Душанбеву Ваҳдат пешбинӣ мешавад.

           

Душанбе. 25-уми март. ОИ «Азия-Плюс» – Дар мусоҳиба ба радиои «Садои Амрико» сиёсатшиноси рус, роҳбари шӯъбаи Осиёи Миёна ва Қазоқистони Донишкадаи кишварҳои узви ИДМ Андрей Грозин изҳор доштааст, ки вазъи иқтисоди ҳеҷ кадоме аз кишварҳои минтақаи Осиё Марказӣ устувору босубот нест.

           А.Грозин гуфтааст, дар сохти давлатдории кишварҳо баъзе тавофут ҷой дорад. «Дар ҳукумати Тоҷикистон муттаҳидӣ ба чашм мерасад», – гуфтааст ӯ.

           

Ба қавли сиёсатшиноси рус, вазъи иқтисодӣ ва иҷтимоии Тоҷикистон сол то сол муташанниҷ мегардад. «Ғайр аз ин, аксари намояндагони элитаи минтақаҳо аз он изҳори норозигӣ мекунанд, ки хешу ақрабои сарвари давлат тамоми бахши тиҷоратро таҳти назорати худ қарор додаанд», – зикр намудааст ӯ.

           

Аз ҷониби дигар, ба гуфтаи сиёсатшинос, чунин вазъ панҷ сол қабл низ ҷой дошт ва аз эҳтимол дур нест, ки боз баъди гузашти панҷ соли дигар низ тағйироте дар кишвар ба вуҷуд наояд.

Душанбе. 25-уми март. ОИ «Азия-Плюс» – Имрӯз тайёраи саввуми иборат аз кӯмаки башардӯстонаи Русия ба Тоҷикистон ворид мегардад.

Чӣ тавре ки аз Кумитаи ҳолатҳои фавқулодда ва мудофиаи граждании ҶТ ба ОИ «Азия-Плюс» хабар доданд, кӯмаки башардӯстона аз захираҳои давлатии Русия ҷудо гардида, барои рафъи оқибатҳои офатҳои табиӣ ва дастгирии бахшҳои гуногуни хоҷагии халқ пешбинӣ шудааст. «Кӯмак аз хаймаҳои истиқоматӣ, қанд, курпаҳои рӯйпӯш ва нерӯгоҳҳои сайёр иборат буда маблағи умумии он ба 12 млн. рубли русӣ баробар аст», – гуфт манбаъ.

Ёдовар мешавем, ки 19-уми март ду тайёраи навъи ИЛ-76-и Русия бо кӯмаки башардӯстонаи Русия вориди Тоҷикистон шуда буданд.

Душанбе. 25-уми март. ОИ «Азия-Плюс» – Дар Тоҷикистон кишти чигит оғоз ёфт.

Чӣ тавре ки аз хадамоти матбуоти Вазорати кишоварзии ҷумҳурӣ ба ОИ «Азия-Плюс» хабар доданд, яке аз нахустинҳо шуда кишоварзони вилояти Хатлон дар арафаи Иди Наврӯз мавсими киштукори баҳориро шурӯъ карданд.

Ба иттилои манбаъ, имсол дар кишвар кишти пунбадона дар майдони 200 ҳазору


700 гектар

гузаронида мешавад, ки 124 ҳазору 400 гектари он дар вилояти Хатлон мебошад ва дар ин вилоят аллакай дар масоҳати 6 ҳазору

219 гектар

чигит кишт карда шудааст.

Ба қавли мутахассиси раёсати кишоварзии минтақаи Кӯлоб Амрохон Ҳаитов, дар минтақа киштукор ҳанӯз 18-уми март аз хоҷагии деҳқонии «Сабз»-и ноҳияи Кӯлоб оғоз ёфта, сипас бо сабаби боришоти зиёд он то 24-уми март мавқуф гузошта шудааст.

А.Ҳаитов мегӯяд, то имрӯз аз майдони пешбинишудаи

33810 гектар

кишти пунбадона дар панҷ ноҳия 600 гектари нахустин кишт шудаанд. «Дар мавсими киштукори соли 2009 заминҳои кишти пахта ба миқдори

600 гектар

кам карда шуд», – гуфт ӯ ва афзуд, ки феълан ҷиҳати дар сатҳи зарурӣ гузаронидани киштукор техникаи кишоварзӣ омода аст.