Душанбе. 21-уми январ. ОИ «Азия-Плюс» – Аз Котиботи Созмони аҳдномаи амнияти дастаҷамъӣ (СААД) хабар доданд, ки Созишнома оид ба фаъолияти сулҳомези СААД ҳукми қонуниро соҳиб гашт.

           

Бино ба иттилои манбаъ, ахири ҳафтаи гузашта ба Котиботи созмон мактуби давлати Русия перомуни ба иҷро расилани қоидаву тартиботи дохиликишварӣ ҷиҳати ҳукми қонунӣ гирифтани созишномаи мазкур ворид гаштааст. Қобили зикр аст, ки Созишнома оид ба роҳандозии фаъолияти сулҳомези СААД аз ҷониби аъзои созмон 14-уми июли соли 2007 дар нишасти Душанбе ба имзо расида буд. Санади мазкур тайи соли 2008 аз ҷониби парлумонҳои Белорус, Қазоқистон ва Арманистон тасдиқ гардида буд.

           

Дар созишнома таъкид мегардад, ки роҳандозии фаъолияти сулҳомези СААД воситаи муассири таҳкими мавқеи созмон ва нуфузи сиёсии он дар арсаи симёсати байнулмилалӣ хоҳад буд. Тибқи созишнома, аз ҳисоби ҳайату қувваҳои кишварҳои узв нерӯҳои сулҳомези созмон таъсис дода шуда, онҳо аз рӯи барномаҳои ягона омӯзонида мешаванд ва дар тамринҳои муштарак мунтазам ширкат хоҳанд варзид.

Дар созишнома иштироки нерӯҳои СААД дар амалиёти барқарории сулҳу субот дар кишварҳои узви созмон ва қаламрави кишварҳои дигар тибқи қарори СММ пешбинӣ шудааст.

Реклама на asia+

           

Кӯлоб. 21-уми январ. ОИ «Азия-Плюс» – Ҳамагӣ 30 дарсади манзили зисти шаҳри Кӯлоб ба рӯйхатгирии аҳолӣ дар соли 2010 омода аст.

           

Тавре директори корхонаи фаръии байниноҳиявии барӯйхатгирии техникии КВД «Хоҷагии манзилию коммуналии»-и Кӯлоб Абдухолиқ Лоиқов ба ОИ «Азия-Плюс» хабар дод, корхонаи мазкур ҳанӯз соли 2007 ба кори ба тартиб овардани ному шумора ва дигар нишондодҳои кӯчаву хонаҳо шурӯъ кардааст, вале бо имконоти худ танҳо аз ӯҳдаи таҳқиқи ҳамагӣ 164 манзили зисти аз 4 то 9-ошёна баромадааст. «Дар шаҳр боз 8010 адад манзили зисти шахсӣ ба қайд гирфта шудааст ва чун корхонаи мо мустақилу худмаблағгузор аст, мо барои доир сохтани чунин кор маблағи кофӣ надорем», – гуфт ӯ.

           

А.Лоиқов мегӯяд, маблағи кори иҷрокардаи корхона ба 42 ҳазору 858 сомонӣ арзёбӣ шудааст, вале то ҳанӯз ҷиҳати пардохти маблағи мазкур ба корхона касе шитоб надорад, ҳарчанд барои ин кор маблағи зарурӣ дар ҳукумат ҷудо гардидааст.

Реклама на asia+

           

Душанбе. 21-уми январ. ОИ «Азия-Плюс» – Зимни нишасти матбуотӣ ректори Донишкадаи технологияи инноватсионӣ ва коммуникатсия Хаёл Бобоев изҳор дошт, ки дар соли хониши нав дар ин муассисаи таълимӣ шӯъбаи тайёр кардани мутахассисон оид ба менеҷменти инноватсионӣ ифтитоҳ мегардад.

           

Ба гуфтаи ӯ, донишкада ният дорад, ҳамчунин дар самтҳои лингвистика, ношир-муҳаррир, кору амал ва таҷриба низ мутахассисон тайёр намояд.

           

Аз нигоҳи Х.Бобоев, як касб дар чандин макотиби олӣ омӯхта мешавад, ҳол он ки бояд омӯзиши касбҳои навро, ки ба он эҳтиёҷ пайдо мешавад, мебояд ба роҳ монд. «Ман ҷонибдори на шумора, балки сифатам», – гуфт ӯ.

           

Феълан дар донишкадаи мазкур 1700 нафар донишҷӯ таҳсил намуда, он дорои 7 шӯъба, аз қабили информатика, иқтисоди ҷаҳонӣ, менеҷмент, низомҳои иттилоотӣ ва фанноварӣ, муносиботи байнулмилалӣ, таъмини лингвистии коммуникатсияҳои байнифарҳангӣ ва ҳуқуқи байнулмилалӣ мебошад.

Реклама на asia+

           

Душанбе. 20-уми январ. ОИ «Азия-Плюс» – Олимони Маркази тадқиқоти стратегии назди президенти Тоҷикистон бар чунин назаранд, ки бӯҳрони ҷаҳонии молиявӣ дар қатори терроризм, ифротгароӣ ва қочоқи маводи мухаддир ба амнияти миллӣ ва иқтисоди ҷумҳурӣ хатари ҷиддӣ дорад. Чунин ақидаи олимонро чанде қабл директори ин марказ Сӯҳроб Шарипов изҳор намуд.

           

С.Шарипов гуфт, бар асари бӯҳрон нархи маҳсулоти содиротии кишвар ним баробар коҳиш ёфт ва мутаносибан даромади кишвар низ аз содирот кам шуд. «Гузашта аз ин, баргаштани муҳоҷирони меҳнатӣ ба кишвар, ки дар хориҷа ҷойи корро аз даст додаанд, ногузир ҷомеаро ба мушкилот мувоҷеҳ хоҳад сохт», – гуфт ӯ.

           

Номбурда чунин ибрози ақида намуд, ки ҷиҳати пешгирии бӯҳрони иҷтимоӣ мебояд дар сатҳи давлатӣ механизми соддаи тақсимоти замин таҳия гардида, эҷоди монеъаҳо дар соҳаи роҳандозии тиҷорат бартараф карда шавад. «Аксари муҳоҷирони меҳнатӣ бо маблағи муайяне бармегарданд ва дар сурати муҳайё сохтани шароити зарурӣ, онҳо метавонанд ин маблағро дар бахши воқеъии иқтисод, аз ҷумла таъсиси корхонаҳои хурд, фаъолияти тиҷоратӣ ва бахши кишоварзӣ истифода намоянд», – таъкид дошт С.Шарипов.

 

           

Ба гуфтаи ӯ, олимони марказ бар асари бӯҳрони молиявӣ бозпас гаштани ҳудуди 30 дарсади муҳоҷирони меҳнатӣ, яъне тақрибан 200 ҳазор нафарро

 

пешбинӣ мекунанд.

           

Тибқи маълумоти Кумитаи давлатии омори кишвар, феълан дар Тоҷикистон шумораи бекорони расман сабтшуда ҳудуди 50 ҳазор нафарро ташкил медиҳад.

Реклама на asia+

    



         

Душанбе. 20-уми январ. ОИ «Азия-Плюс» – Муҳоҷирони меҳнатии тоҷики шаҳри Екатеринбурги Русия аз Эмомалӣ Раҳмон дархост карданд, ки сармояи онҳо ба бунёди иншооти гидроэнергетики ҷумҳурӣ ҷалб карда шавад. Дар ин бора аз Екатеринбург тавассути телефон роҳбари диаспораи тоҷикони «Сомон» Фарҳод Мирзоев ба ОИ «Азия-Плюс» хабар дод.

           

Ба гуфтаи ӯ, муҳоҷирон тариқи хаттӣ ба сарвари давват дар ин хусус муроҷиат кардаанд. «Мо аз Эмомалӣ Раҳмон дархост намудем, ки ба ҳукумат оид ба таҳияи лоиҳаи махсуси ҷалби сармояи муҳоҷирони меҳнатӣ супориш диҳад», – гуфт ӯ.

           

Номбурда мегӯяд, дар сурати пазируфтани пешниҳоди онҳо, муҳоҷирони меҳнатӣ имкон пайдо мекунанд, дар бунёди иншооти гидроэнергетикии кишвар саҳм бигиранд. «Мо аз ҳамаи муҳоҷирони меҳнатии тоҷик дастгириро интизорем ва гуфтанием, ки мувофиқи имкон аз саҳм доштан дар бунёди чунин иншоот худро канор нагиранд», – афзуд Ф.Мирзоев.

           

Ёдовар мешавем, ки аз ворид гаштани чунин дархост президенти Тоҷикистон дар ҷаласаи ҳукумат ҳафтаи гузашта хабар дода буд.

Реклама на asia+

Душанбе. 20-уми январ. ОИ «Азия-Плюс» –


19 январи соли 2009 дар Мақомоти иҷроияи маҳаллии ҳокимияти давлатӣ дар шаҳри Душанбе ҷаласаи васеи кории шаҳрдорӣ баргузор гардид.

Дар ҷаласа Раиси шаҳри Душанбе Маҳмадсаид Убайдуллоев изҳор дошт, ки


шаҳрдорӣ барои ҷалби инвеститсияҳои дохиливу хориҷӣ, пеш аз ҳама сармояҳои ҳамватанони бурунмарзӣ тамоми шароитҳоро фароҳам меорад, ки дар татбиқи лоиҳаҳои сохтмонӣ потенсиали мавҷудаашон амалӣ гарданд. Баҳри ҳавасмандии онҳо омодааст, ки ҳамчун имтиёз аз пардохти андозҳои маҳаллӣ озод намояд.

Дар ҳамин радиф масъулини соҳаро муваззаф сохт, ки ҷиҳати ҳарчӣ зудтар ба анҷом расонидани масъалаи таҳрири нави Нақшаи генералии шаҳр озмуни такрории байналхалқӣ оид ба дарёфту интихоби

 

пудратчии иҷрои ин амал эълон карда шавад.

Вобаста ба бунёди иншооти армуғонии шаҳрдорӣ ба ифтихори 20-солагии Истиқлолият- 2 бинои 20 ошёна ба Кумитаи заминсозӣ ва Сарраёсати меъморӣ ва шаҳрсозии шаҳр дастур фармуд, ки оид ба интихоби қитъаи замин унвонии шаҳрдорӣ пешниҳодҳо ирсол намоянд. Дар ин бора котиби матбуотии раиси шаҳри Душанбе Шавкат Саидов хабар дод.

Реклама на asia+